SHILLONG: Meghalaya a·dokona gipin a·dokrangoniko ra·baenggipa na·tokrangko porikka ra·anio cancer aro dingtang dingtang sabisirangko ong·atna man·gipa formalin samrangko man·ani ja·man gipin biaprangoniko a·dokona na·tok ra·baaniko sal 15-na champengataha.
Meghalaya a·dokona na·tokrangko mongsongbate Andhra Pradesh aro uandakgipa a·dokrangonikosa ra·barongbatengachim ine nikna man·a.
Ia sal 15-ni gisepo gipin biaprangoniko ra·baenggipa na·tokrangko gipin biaprangona sualatna, chimonge donna ba palna gita man·jawa ineba sorkarini u·iatanio parakataha.
“Mang 40 na·tokrangko porikka ra·e iani report-ko man·soanio mang 30-ode formalin samko man·aha ine sorkarini Food Analyst-ni report-o parakaha aro ia samrangara mandena namen namjabegipa ong·achim,” ine a·dokni Food Safety Commissioner Rosetta Mary Kurbah parakataha.
Sorkarini u·iatani gitade, a·dokona ra·baenggipa na·tokrangko champengatahani gimin saoba ia dongimin niamko pe·genchimode bilsisnina pattoko donatako man·an baksana gong lak 10-ona kingking daiko gamna gita nanggen.
Na·tokrangko soatgija rakkina gita ia formalin samrangko jakkalengani gimin a·songni dingtang dingtang biaprango iandakgipa na·tokrangko palna gita on·jaengoba Meghalaya a·doko na·tok badinge cha·enggiparang, iako jegale na·tokrangko palna jotton ka·skakuengachim.
Ia formalin samrangara, na·tokrangokosan ong·aigija manggisirangkoba soatgija rakkina jakkalgipa sam ong·e mandena cancer aro uandakgipa ma·manti sabisirangko ong·atna man·na.