Nongpoh: Conference of Religious India (CRI) Ri Bhoi Zone-ni ong·atgipa rally-o North East region of India -ni religious ba toromni gita dilgiparang a·songni gimik bakrango so·sojengjeng ong·aniko tom·tomatna aro duk-neng·nikao ga·akgiparang baksa chadengpana ba chakpana gita rally-o bak ra·angtokaha.
Rally-ko Nongpoh Town Shopping Complex-oni a·bachengate Pahamsyiem-ko napakke Nongpoh Parish-o dontongataha. Rally-o bak ra·giparang placard-rangko de·e bak ra·angtokaha.
Conference of Religious India (Ri bhoi Zone)-ni president Br. Sunil Britto, tom·anio bilakgipa kattarangko ba didiatani kattarangko aganangaha. A·songni dingtang dingtang bakrangon golmal ong·anirangko nikna man·enga. Manipur-oba Christian aro tribal-rangko nisan ra·enga, gilja nokrangko chadrapenga aro saksa sakgipinni kosako mitchigrikani kattarang agananiko nikna man·enga. Me·chik wrestler-rangba uamangni neng·nikako bon·atna sorkario dabie jinjengatenga. Ia rally-ko ong·ataniara, a·songni pilak manderang duko ga·ake dongengiparangna bi·chakna tom·aha.
Rally-o North East church dilgiparang- Br. Varghese SG, Sr. Escociana Vaz MSMHC, NE Regional CRI Secretary, Sr. Prema Chowallur SCC, Convener of the North East FORUM of Religious for Justice and Peace, Sr. Teresa Kamasuam FMA, CRI Shillong President Fr. Laurence Kharluni, aro Br. Sunil Britto CFC, President of CRI Ri Bhoi- uamangko man·gope bang·an bak ra·angtokaha. Una agreba St. Stephen Hostel Girls, Opel Lyngdoh-ni chadamberang, Nongpoh aro Mawroh-ni headman aro gipinrang bak ra·angtokaha.
