Shillong: UDP-ni dilgiparang legal expert-rang baksa tom·e Sukrobar salo job reservation policy 1972-ni gimin chanchibewalangaha.
Meghalaya State Planning Board (MSPB)-ni chamber-o Chairman aro party president Metbah Lyngdoh-ni dongpaanio UDP dilgiparang, legal luminary-rang baksa tom·angaha.
UDP dilgiparang Paul Lyngdoh, Jemino Mawthoh, Kyrmen Shylla, Balajied Kupar Synrem, Olan Singh Suin, Nujorki Sungoh- uamang meeting-o bak ra·angaha.
A·gipi lawyer VGK Kynta-ba meeting-o bak ra·angpaaha.
Da·o ding·doenggipa mamlani bidingo chanchirimna UDP-ni ja·ku de·aniko Kynta, de·mittelataha.
“Tom·anio job reservation policy-ni gimin chanchibewalangaha aro tom·bimangani namen bite gnanggipa ong·aha. Mikkangchi gipin political dolrang angko meeting-ona okama ong·ode anga bak ra·na kusi ong·gen ineba aganangkuaha.”
UDP working president Paul Lyngdoh, tom·a matchote kobor ra·timgiparang baksa agangrikataon, “legal expert-rang baksa chanchirimna tom·ania miksonganiara party MLA-rang aro dilgiparangna ia job reservation policy-ni gimin talate ba u·iate on·na ong·a,” ine parakataha.
“Chinga dilgiparang ong·e, roster system aro reservation policy-iarangni gimin tale u·ie ra·chengna nangnika,” ine Lyngdoh aganaha.
