SHILLONG: 2021 bilsio Shillong-o donggipa Food Corporation of India (FCI)-ni bosta lak 1 merongrangko Kamrup a·jani Boko-o donggipa private godown-oniko rim·aniko National People’s Party (NPP)-chi dilenggipa Meghalaya Democratic Alliance (MDA) 2.0 sorkari jegale, an·tangtangko jokatna jotton ka·enga ine Robibar salo, Meghalaya a·dokni All India Trinamool Congress (AITC) matnangatahani gimin ia Rice Scame-ni inquiry report-ko name nipiltaichina aro nanggenchim ong·ode inquiry commission-ona re·ange sing·sandiechina gita a·dokni Cabinet Minister Paul Lyngdoh, AITC-ni dilgiparangko aganaha.
2021 bilsio Shillong-o donggipa Food Corporation of India (FCI)-ni bosta lak 1 merongrangko Kamrup a·jani Boko-o donggipa private godown-oniko rim·ani ja·man ia merongrangko ong·gija kamrangna jakkalsretaha ine matnanganiko Meghalaya a·dokni Social Welfare Minister Paul Lyngdoh jegalatenba, iani bidingo matnanganiara maming pangchakani gri matnanganisan ong·aia ine parakatahachim.
Indake ong·genchimoba, iani bidingo sorkarini jegalengani gimin MDA 2.0 sorkariko a·dokni AITC dol matnangatskaenba, ia Rice Scam-ni inquiry report-ko jinmana parakgija da·o an·tangtangko jokatna jotton ka·enga ine Meghalaya TMC-ni vice president George V Lyngdoh parakatskaahachim.
“Rice scam-ni bidingo ia sorkarini jegalaniara maming gital katta ong·ja maina ia sorkari pangnan an·tangtangni ong·gija dakgipa kamrangko iandaken jegalrongaia,” ine TMC-ni dilgipa matnangatahachim.
Indake ong·engon, TMC-ni iandake matnanganiko MDA sorkarini ku·wattimgipa aro Social Welfare Minister Paul Lyngdoh jegalatskaenba, iani inquiry report-ko jinmana mesokatmanaha aro uamangba ia report-ko name nipiltaina man·a ine parakatskaaha.
