TURA: Garo Hills-o bilsiantian Secondary School Leaving Certificate (SSLC) porikkani result-rang namjaengani gimin mikkangchi result-rangko nambatatna gita sorkari skulrango skie on·ani bewalrangko namdapatchina A·chik Youth Council (AYC), a·dokni Chief Minister Conrad K Sangma-na sedoataha.
AYC-ni general secretary Maxbirth Gabil Momin-ni parakatani gitade, lekka poranian chadamberangni janggi tanganiko tarianio mongsonggipa chol gita ong·achim indiba Garo Hills-o bilsiantian SSLC porikkani result-rang namjaenganiara A·chik a·songo songdongenggipa pilaknan jajrengna nangani ong·engaha.
SSLC porikkao result-rangni namrongjaengani mingsa a·selara primary aro secondary skulrango skie on·anirang chu·ongjaengani gimin ong·enga ine janapatengon, ia skulrango skie on·ani bewalrangko namdapatna gita ta·raken ja·kurangko de·china AYC, a·dokni Chief Minister-ko didiataha.
“Lekka porani gadangko namdapatanichi chatro chatrirangna nangchongmotgipa u·ina nanganirangko on·e ia ta·rakbee re·enggipa a·gilsako susapana cholko on·na dakchakgen,” ine Momin parakataha.
Skigiparangko nambate kam ka·china didina gita sorkari skulrango skigiparangna somoi gita dormaharangko on·skachina gitaba AYC, a·dokni Chief Minister-ko didiataha.
“Skigiparangna somoi gita aro ja·manchake dormarangko on·engani a·selba haida skigiparang kamtangtango gisik nangjaenga gita nika aro iani a·selan chatro chatrirangni poraianirangosa nangchakeaniko man·skaenga,” ine AYC-ni general secretary janapatenba, skigiparangna somoi gita dormaharangko on·jringchina sorkariko didiataha.
Skulrango nambata result-rangko nikna man·na gita skulrangchi re·na gisik nanggijagipa skigiparangni kosako rakbatsranggipa ja·kurangko de·china gitaba AYC didiataha.
“Skulrango skigiparang somoi gita re·ama re·jaenga aro kamtangtangko name ka·ama ka·jaenga uko ma·sina gita education official-rang, sorkari skulrangko pangnan re·e nijringna nanga. Iachiba an·ching skulo poraienggipa bi·sarangna namgipa dakmesokaniko on·na man·gen,” ine Momin parakataha.