SHILLONG: Meghalaya a·doko gimik mang 6,740 matchurang, Lumpy Skin Disease (LSD)-ko man·aha aro ianoni mang 45 matchurang, a·dokni dingtang dingtang biaprango siaha ine sorkari official-rang parakataha.
Sorkari official-rangni parakatani gitade, LSD-ko man·e sianggipa mang 45 matchurangoni mang 30-de West Jaintia Hills a·jao, mang 8-de Ri Bhoi a·jao, mang 5-de South West Khasi Hills-o, mangsade East Khasi Hills-o aro mangsade Eastern West Khasi Hills a·jao ong·a.
LSD-ko man·gipa mang 6,740 matchurangoni mang 1477-de Ri Bhoi a·jao, mang 1353-de West Jaintia Hills a·jao, mang 1081-de Eastern West Khasi Hills a·jao, mang 989-de South West Khasi Hills-o, mang 980-de East Khasi Hills-o, mang 560-de West Khasi Hills-o, mang 152-de West Garo Hills-o, mang 60-de East Garo Hills-o, mang 43-de East Jaintia Hills-o, mang 32-de South Garo Hills-o aro mang 13-de South West Garo Hills a·jao ong·a.
Indake ong·genchimoba, LSD-ko man·gipa matchurangoni June 12 tarikona kingking, mang 3799-de nampilaha ine sorkari official-rang parakataha.
Iani bidingo Animal Husbandry & Veterinary department-ni Assistant Director (Disease Investigation) Dr P Blah War-ni kobor ra·timgiparangna parakatani gitade, batanggimin adita salrangni gisepon a·doko matchurangni LSD-ko man·ani rang·san tang·onbaaha.
A·doko matchurangni sabisi man·aniko name nirokna gita sorkari, dol 168 Rapid Response Team-rangko songaha ineba Dr War parakataha.
African Swine Fever (ASF)-ni gimin sing·anina aganchakaniko on·angskaengon, June 2 tarikonin a·doko wakrangni sianirangko uamang knasoa dongkujaenga ine Dr Blah War parakataha.
“Meghalaya a·dokni dingtang dingtang biaprango AFS-ba nangchakeaniko ra·baaha indiba Garo Hills-ona bate Khasi Jaintia Hills jolrango bilongbatangaha,” ine AH & Vety official parakataha.
ASF aro LSD sabisi minggnian mandena nangchakeaniko ra·bagipa ong·ja ine talataniko on·angengon, be·enrangko name song·chengesa cha·china gita ua a·dokni manderangna ku·pattianiko on·angskaaha.
