SHILLONG: Meghalaya a·dokni secondary level-o chadamberangni poraia dontongani batroroenganichi a·song gimiko bang·batgipa ong·engani gimin a·dok sorkari, iani bidingo am·sandianirangko dakna manchiangaha.
Iani bidingo kobor ra·timgiparangna talataniko on·angengon, Meghalaya a·dokni secondary level-o poraianiko dontonggiparang 21 percent ong·a ine report-o parakataniara a·dokna namen jajrengna nangani ong·aha ine Budbar salo, Education department-ni Adviser HM Shangpliang parakataha.
“Iani bidingo aganchakaniko man·na gitade ning·tue am·sandianichisa ong·gen ine chinga bebera·a. Iani bidingo a·dokni Education Minister Rakkam A Sangma-na department-na ge·etaniko on·atmanaha,” ine Shangpliang aganaha.
Shangpliang-ni parakatani gitade, 2020-2022 bilsirango class 10 aro class 11-rango poraia dontonggiparang sak 20,000-mang ong·angpilahachim.
Ian metric porikkao chu·sokjani gimin ba chubata gadangrango poraidapangna chol ong·jani a·selrangba ong·engnaba gnang ine Education department-ni Adviser aganaha.
“Chingni report-oniko nikna man·ani gitade, class one aro class two gadangrangoba skul re·chipgijagiparang dongani gimin ua gadangrangoba poraianiko dontonggiparang dongna nanga. Uni gimin ia pilakni a·selko name ma·sina gita chinga name am·sandina nangenga,” ine Shangpliang aganaha.
Bakan a·doko gital education policy-ko ra·gatgnok ineba Education department-ni Adviser parakataha.
Shangpliang-ni parakatani gitade, ia gital education policy-ara a·dokni nangani kri ong·gen aro iani bidingo a·dokni Education Minister-ba Meghalaya Education Policy-ko gital dake draft ka·na committee-ko songchina gita ge·etaniko on·manaha.
