SHILLONG: Meghalaya a·doko drugs ba pekatgipa sam jakkalaniko aro badinganiko bon·atna gita kam ka·enggipa toromni dolrangna a·dok sorkari, bilsiprako gong kror 10 tangkarangko chamgen ine Bristibar salo, a·dokni Social Welfare Minister Paul Lyngdoh parakataha.
Pekatgipa samrangko jakkalani aro niam gri badingsrukanirangko champengna nangengani gimin Bristibar salo, Shillong All Faiths Forum (SAFF)-ni dilgiparang baksa tom·e chanchirimangani ja·man, iako a·dokni Social Welfare Minister, kobor ra·timgiparangna parakataha.
Lyngdoh-ni parakatani gitade, ia tom·anio dingtang dingtang toromni dilgiparang bakko ra·angenba, a·doko drugs jakkalani aro badingsrukaniko champengna gita ku·pattianirangko sorkarina on·angaha.
“A·doko drugs jakkalani aro drugs badinganirang batroroengako nike bilakbate kamrangko ka·na gita ia tom·anio chinga chanchirimangaha. A·doko counselling centre-rangko bariatna aro dingtang dingtang biaprango manderangna mikrakatanirangko on·na gitaba ia tom·anio chanchirimangaha,” ine Lyngdoh aganaha.
Social Welfare Minister-ni parakatani gitade, skulni curriculum-oba drugs jakkalani namgijaniko skie on·na aro chatro chatrirangna drugs-ni bidingo mikrakatanirangko on·angkuna gitaba ia tom·anio sorkari, SAFF-ni dilgiparang baksa chanchirimangaha.
Meghalaya a·doko drugs jakkalbatenggipa damsni a·jarangko sorkari sandimanaha ine janapatengon, a·dokni skotong Shillong songjinmaan drugs jakkalbatenggipa biap ong·ani gimin sorkari, ia biapon mikrakatanirangko bilakbatatna tik ka·angaha ine Lyngdoh parakataha.
“Ia pilot project-o chinga Shillong songjinmako dingtang dingtang bak dake kamrangko ka·anggen aro drugs jakkalaniko bon·atna gita badinggiparangko aro jakkalgiparangkoba sandina agangrikjringe kamrangko ka·anggen,” ine Social Welfare Minister parakataha.
