TURA: Meghalaya Board of School Education (MBOSE)-o peon-ni kamko ka·enggipa Omarius D Sangma-ko Bristibar salo police-rang, drugs ba pekatgipa samrang baksa rim·na man·aha ine kobor on·aha.
Koborrangko man·soani ja·man West Garo Hills Anti Narcotics Task Force (ANTF)-ni sipairang, Tura Daldagre-o donggipa ia mandeni nokona re·ange am·sandianirangko dakon, ia mandeni nokoniko Pyeevon Spas Plus minggipa samrangko strip 30 man·aha aro ia samrangko man·ani ja·man police-rang, ia mandeko rim·aha.
Police-rangni u·iatani gitade, ia mandean Tura-ni gipin biaprangonaba pekatgipa samrangko watattimengakon ine chanchichipenga.
Iani bidingo police-rang mokordoma ka·e, am·sandianirangko dakengkua ineba kobor on·aha.
