SHILLONG: Ru·utbea bilsirangonin Meghalaya a·doko Inner Line Permit (ILP)-ko ra·gatchina dingtang dingtang dolrang dabitokengoba, Sukrobar salo ma·mongoni re·bagipa BJP-ni dilgiparang, iani bidingo maming ma·siani dongja aro mamingkoba aganna man·jawa inesa parakatskaaha.
Meghalaya a·doko ILP-ko ra·gatchina dabienggipani bidingo sing·on, “Anga an·tangde iani bidingo mamingkoba ma·sija aro iani bidingo aganna gitade angna bilko on·na dongja,” ine BJP-ni national secretary Sunil Deodhar parakataha.
ILP-ko ra·gatchina gita ma·mong sorkariko didina Meghalaya Legislative Assembly-ba resolution-ko pass ka·manahachim indiba da·alonan ILP-na dabiani maming be·en pil·na man·kujaengachim.
Meghalaya a·doko ILP-ko ra·gatchina dingtang dingtang dolrangni dabie jingjengatanirangko dakahani gimin Bengal Eastern Frontier Regulation 1873-ni ning·o ILP-ko ra·gatchina India sorkariko didie, Meghalaya Legislative Assembly, 2019 bilsini December 19 tariko resolution-ko pass ka·ahachim ine nikna man·a.
Ia resolution-ko a·dokni Chief Minister Conrad K Sangma dakdilahachim aro ia resolution-ko Assembly-ni pilak membor-rangan ra·chaktokahachim.
Assembly-o resolution-ko pass ka·aoni da·o bilsi bonga ong·pilengahaoba aro a·dokni minister-rang, MLA-rang aro NGO-rangba Union Home Minister Amit Shah-ko gronge iani bidingo agangrikahaoba da·alonan ma·mong sorkarioni ILP-ni bidingo maming ku·rachakanirangko on·na dongskakujaengachim.
