TURA: Tura jillao me·chik bi·sa saksako drae til·ekna jotton ka·ahani gimin Tura Dobakkol-ni bilsi 70 ong·gipa Pranesh Chakraborty Roy-ko POCSO Court, bilsi bongana pattoko donan baksana gong 10,000 daiko gamchina rai on·ataha.
Koborko on·ani gitade, 2021 bilsini June 18 tarik pring 10:30 bajimango, Tura Dobakkol-oni bilsi 70 ong·gipa Pranesh Chakraborty Roy, me·chik bi·sa saksako uni noko drae til·ekna jotton ka·aha ine Tura Women Police Station-na me·chik bi·sani nokdang kobor on·ataha.
Koborko man·soani ja·man, iani bidingo mokordomako ka·e ia case-ko UB WPSI Esther Ch Marak jako ra·enba, am·sandianirangko dakna a·bachengataha aro 2021 bilsini July 29 tariko, dos dakgipa mandeni kosako charge sheet-ko ka·aha.
Charge sheet-ko ka·ani ja·man, dos dakgipa mandeko West Garo Hills POCSO Court-ni Special Judge, bichal ka·na a·bachengataha aro bichal ka·a matchotahaon, dos dakgipa Pranesh Chakraborty Roy-ko dos donga ine nikenba, bilsi bongana pattoko donchina aro gong 10,000-ko dai dake ra·china POCSO Court, raiko on·ataha. Ia daiko gamna man·jagenchimode dos dakgipa mandeko jagittamna pattoko dondapangkugen aro POCSO Act-ni 11(i)/12-o pangchake, dos dakgipa mandeko bilsisa pattoko donan baksana gong 2000/-ko dai gamna nanggen ineba POCSO Court-ni Special Judge rai on·ataha.