TURA: Tura-ko Winter Capital songchina dabie, Sukrobar salo skanggipa changna Tura-o asonge jingjengataniko A·chik Conscious Holistically Integrated Krima (ACHIK) ong·atangaha aro ia jingjengatanio dingtang dingtang dolrang aro Garo Hills-o songdongenggipa manderangba bakko ra·angaha.
Ia jingjengataniko ong·atanio ACHIK Krima Council-ni president Thomas M Marak, jinmana aganprakangengon, a·dokko man·e on·chengdilgipa pagitchamrangan Tura-ko Second Capital ba Winter Capital songna songgrikahaoba da·o Meghalaya a·dokko man·aoni bilsi 51 gappilahaoba ian jumang gitasan ong·kuenga ine parakataha.
Ia tom·e jingjengatanio ACHIK Krima Council-ni working president Macklawrence M Sangma-ba jinmana aganprakangengon, Meghalaya a·dokni bilsi 51-na re·mikkanganio, Tura-ko Winter Capital songani bidingo Garo Hills-ni bang·a NGO-rangan sorkarina memorandum-rangko on·aha indiba iandake jingjengatanirangko daka dongkujachim ine talataniko on·angenba, da·o skanggipa changna Tura-ko Winter Capital songchina dabie ia sit-in-demonstration-ko ong·ataniara Garo Hills-o gisik ra·na krabeani sal ong·enga ine parakataha.
Ia tom·anio GSU-ni gitcham dilgipa aro GHADC-ni gitcham CEM PK Sangma-ba bakko ra·e jinmana aganprakangengon, Meghalaya a·dokko songchengani somoion a·dokni dilgiparang songgigrikmanahani gimin Tura-ko Winter Capital songaniara A·chikrangni bilan ong·a aro Tura-ko Winter Capital songgijade Meghalaya a·dokko man·aniara indin ong·gramaia ine parakataha.
Ia tom·anio ACHIK-ni general secretary Bernita R Marak-ba jinmana aganprakangengon, Winter Capital-ni bidingo agan-talate on·angenba, Tura-ko Winter Capital songahaode Tura-an jadokna Legislative, Executive aro Judiciary-ni gitaba skotong songjinma ong·gnok ine parakataha.
Ia jingjengate tom·aniko ong·atanio dongpae jinmana aganprakanggipa gipin manderangara, gitcham MCS officer Laben Ch Marak, GSU (CEC) Interim Body-ni general secretary, GSMC-ni dilgiparang, FKJGP Garo Hills Zone-ni vice president aro gipinrang ong·a.
Tura-ko Winter Capital songchina dabie skanggipa changna Tura-o jingjengata
Date:
Share post:
