SHILLONG: Sombar salo, Khasi Hills Autonomous District Council (KHADC)-ni Summer Session-ko a·bachengatani salo, United Democratic Party (UDP)-chi dilenggipa Executive Committee-ni kosako No-Confidence Motion-ko ra·gate be·gruatani ja·man, National People’s Party (NPP) aro Congress dolrang bakrime, gital Khasi Hills Democratic Front (KHDF) Executive Committee-ko rikskaaha.
Ia gital EC-o NPP-ni sak 11 aro Congress-ni sak 6 MDC-rang dongachim.
KHADC-ni CEM Titosstarwell Chyne-chi dilenggipa Executive Committee be·gruani ja·man, CEM-ni kamna susana gita NPP-ni MDC Pyniaid S Syiem, nomination-ko file ka·angskaaha.
KHADC-ni gital CEM-ko seokna gita Mongolbar salo election-ko ong·atengachim.
KHADC-o NPP baksa bakrimani gimin talataniko on·angengon, Congress dolni MDC-rang, NPP baksa bakrimjagenchimode KHADC-o Governor’s Rule-ko ra·gatskagen aro Governor’s Rule-ko ra·gatna nanggenchimode KHADC-o Khasirangni niam retirang aro daka rikani bilrangko sawa chel·chakgen ine Mylliem-ni Congress MDC Ronnie V Lyngdoh sing·doataha.
KHADC-ni namgninasa Congress MDC-rang, NPP baksa bakrimaha ineba Lyngdoh parakataha.
KHADC-ni CEM Titosstarwell Chyne-ni kosako No-Confidence Motion-ko ra·gatanio, NPP-ni sak 11 aro Congress-ni sak 6 MDC-rangko man·gope, sak 17 membor-rang vote ka·ani ja·man, Chyne-chi dilenggipa Executive Committee be·gruahachim ine nikna man·a.