TURA: Sombar salo, Tikrikilla jolo donggipa dingtang dingtang NGO-rang, Hollaidanga Range Forest Office-ni manderang baksa ia jolo niam gri chalaienggipa saw mill damsako rim·na man·taiaha.
West Garo Hills a·jani a·kawe jolrango niam gri chalaienggipa saw mill ba bol ratani karkanarangko bon·atsrangna gita Phulbari GHADC Range, rakbee kamrangko ka·engachim aro uandaken Sombar saloba NGO-rangni dakchakanichi forest official-rang, ia jolrango niam gri chalaienggipa saw mill damsako chipe donatna gita man·aha.
Ia niam gri chalaienggipa saw mill-ko Tikrikilla jolo donggipa dingtang dingtang NGO-rang, chong·motan CEPARD, NGCO, AAPE, ACHIK aro FAF dolrangni dakchakanichi forest department-ni manderang chadrapeaha aro ia saw mill-ko chipe donatna man·aha.
Tikrikilla police station-ni ning·o donggipa Hollaidanga jolmangmangon dam 10-na baten niam gri chalaienggipa saw mill-rang donga ine adita salrangna skangsan jolni NGO-rang parakatahachim.
Koborko on·ani gitade, ia saw mill-rangona, a·kawe jolni a·briarigipa biaprangonikosa bol wa·arangko ra·baskaengachim.
“Ia jolrango saw mill-rangko chalaiengani a·selan bol wa·arangko skatang den·e palsrukanirangba batroroenga aro ian an·ching Garo Hills-o songdongenggipa pilaknan kenchakna nangani ong·enga. Uni gimin iandakgipa saw mill-rangko chu·gimik bon·atsrangna nanga. Bolrang dongjaengahani a·selan an·ching chirangkoba man·jaengaha aro ia saw mill-rangko an·ching ta·raken bon·atjagenchimode mikkangchi an·chingna namjabatgipa sal somoirang sokbaengaha,” ine CEPARD-ni president Gloringstone Marak parakataha.
Kobor on·ani gitade, Sombar salo NGO-rang aro forest official-rangni rim·e chipatgipa saw mill-ara Jugirjhar songni saksa Mohibul minggipa mandeni ong·achim.
Ia saw mill-oniko forest official-rang, bang·bea bolrangko rim·na man·aha aro ja·mano ia bolrangko Hollaidanga range office-ona ra·baaha ineba kobor on·aha.
