TURA: Tura-o PA Sangma Sports Complex-ni mitam bak be·wakangani ja·man, tangka paisarangko jakkalsretanina aro kamrangko ka·sretanina National People’s Party (NPP)-chi dilenggipa Meghalaya Democratic Alliance (MDA) sorkariko All India Trinamool Congress (AITC) matnangataha.
Bristibar pringo mikkarang jime waangani ja·man, PA Sangma Stadium-o a·arang rurongenba, ia stadium-ni mitam bak be·wakangahachim ine nikna man·a.
Iani bidingo NPP-chi dilenggipa MDA sorkariko matnangatengon, sorkarini kamrangko ong·telaigipa bilrangan dake nigipa gita ong·a aro da·aloba mikkarang waanichi MDA sorkarini tangka paisa jakkalsretaniko, tol·pinaniko aro kamo chu·onggijanirangko jinmana paraktaiaha ine AITC-ni chadambe dolko dilgipa Richard Marak parakataha.
PA Sangma Sports Complex-ni Football Stadium-ko re·anggipa 2022 bilsini December jaosan a·dokni Chief Minister Conrad K Sangma nokdonggae on·angahachim ine nikna man·a.
“PA Sangma sports complex-ko nokdonggaoni da·o bilsisaba ong·kuja indiba da·on ia stadium-ni pakma ramachipakna be·wakange, manderangna kenjagokataniko ra·baaha. Ia stadium-ko rikengmiting somoion kamrang namjani gimin manderang badi ka·tokahachim indiba manderangni badi ka·anirangko NPP knachakgija, opposition dolrangkosa politics kal·enga ine matnangskaaiaha. Da·alo ia pakma be·wakanian uamangni kamko mesokaha,” ine Marak parakataha.
Ia PA Sangma Sports Complex-ko gong kror 127.7 koros ong·e jillani bijangchio manderangna kenchakna nangani gnang aro parking-na biaprangko dona gri rikaha ineba AITC-ni dilgipa parakataha.
“Ia stadium-ko rikna skangan sorkari, obostarangko name nichengna nangachim. Indiba ia sorkari, manderangni namgnina bate an·tangtangni man·gninasa rikaha aro da·alo uamangni ong·gijagipa kamrangko jinmana mesokaha,” ine Marak parakataha.
Re·anggipa bilsioba gong kror 177.7 koros ong·e rikenggipa gital Meghalaya Assembly-ni ton 70 ong·gipa dome be·gruaha ine janapatengon, iana skangba a·dokni manderang dolongrangko be·gruaniko aro nokdonggana skangan Shillong ISBT-o selpruanirangko nikna man·ahachim ine Marak parakataha.
“Ia a·selrangni gimin darang minister-rangan resign ka·jaha aro iani bidingo minister-rang, engineer-rang aro contractor-rangni kosako maming ja·kurangkoba de·jaha,” ine AITC-ni dilgipa parakataha.
Tura Chandmary-o tarigipa football stadium-ni gimin janapatskaengon, ia stadium-o rakgipa a·aosa tarigipa samsirangko anaiaha aro ian kal·giparangna namen kenchakna nangani ong·enga aro ia stadium-o nalarangkoba tarijahani a·selan mikkarang waahaode chirang sikkongenga ine Marak parakataha.