SHILLONG: Meghalaya a·dokni Reservation Policy-ko gital dake nipiltaina expert committee-ko songanio, gipin biaprangoni u·i-ma·sigipa manderangkoba ia committee-o donatna gita sorkarini manchienganiko Meghalaya a·dokni All India Trinamool Congress (AITC) raken jegalataha.
“Ia pilakan sorkarini daitosa ong·a beben indiba Khasi, Jaintia aro Garorangni spelling-kon man·gijagipa manderangkode maikai reservation policy-ko nipiltaiatna man·gen? Gipin a·dokni manderangde a·dokni gimin aro a·doko songdongenggipa jatrangni gimin u·i-ma·sigiparang ong·ja,” ine Robibar salo, AITC-ni vice president George B Lyngdoh parakataha.
Reservation policy-ko nipiltaina gita songgipa expert committee-o a·doktangoni u·i-ma·sigipa manderangsan ong·aigija je biaponiba ong·na man·aigen ine adita salrangna skangsan a·dok sorkari parakatahachim ine nikna man·a.
Iani bidingo sorkariko sing·doatengon, “Gipin biapni manderang maikai a·doko songdongenggipa manderangni nangnikaniko ma·sigen? Ian niamni gimin u·i-ma·siaianikosan nanga ong·ja indiba a·doko songdongenggipa jatrangni giminba ma·sigiparang ong·na nanga,” ine Lyngdoh parakataha.
Meghalaya a·doko indita bilsirangna sorkariko chalaianio u·i-ma·sigipa manderang bang·en donga ine janapatengon, a·doktangni manderangon sorkari bebera·jaengama ine AITC-ni state vice president sing·doataha.
Expert Committee-ni sakbonga membor-rangko sandina gita, Chief Secretary-chi dilenggipa membor sakgittamni Search Committee-ko adita salrangna skangsan sorkari songe donangahachim ine nikna man·a.
