SHILLONG: Meghalaya a·doko drugs ba pekatgipa samrangko jakkalani aro badinganiko champengna gita Sombar salo, Drug Reduction, Elimination & Action Mission (DREAM)-ko a·dokni Chief Minister Conrad K Sangma, Shillong songjinmani U Soso Tham Auditorium-o a·bachengate on·angaha.
Sombar salo, International Day Against Drug Abuse & Illicit Trafficking-ko Meghalaya Police aro Social Welfare department-ni manidilangani somoio ia DREAM mission-ko Chief Minister, a·bachengate on·angaha.
Meghalaya a·dokko pekatgipa samrangoni jakgitel ong·gipa a·dok ong·atna gita ia DREAM mission-ko Meghalaya Cabinet, ia 2023 bilsini January 12 tariko pass ka·angahachim ine nikna man·a.
Ia program-ko ong·atanio a·dokni Chief Minister, tom·anio bak ra·giparangna aganprakangengon, Meghalaya a·dokko drugs ba pekatgipa samrangoni jakgitel ong·gipa a·dok ong·atna gita sorkari rakbee kamrangko ka·enga aro iani bidingo ia DREAM mission-ko da·alo a·bachengate on·aha ine parakangaha.
“Drugs ba pekatgipa samrangara nokdangrangkosan nisiaigipa ong·ja indiba songsal aro mikkang salrangkoba nisigipa ong·a. Chadamberang pekatgipa samrangkosa jakkale bon·aigenchimode sorkarini ra·gatenggipa pilak program-rang aro policy-rangara indin ong·gramaigen,” ine Chief Minister aganaha.
Batanggimin adita jarangni gisepon sam badinggiparangko aro krorni kror drugs-rangko rim·na man·ahani gimin Police department-ko mittelpilangengon, a·doko drugs jakkalaniko aro badingsrukaniko bon·atsrangna gita mikkangchiba apsan daken kamko ka·angkuchina gita Chief Minister, Police department-ko didiangaha.
