SHILLONG: Tura-o gital rikgipa PA Sangma Stadium-ni pakmarang, adita salrangna skang be·wakangahani gimin mikkangchi manderangna aro manderangni gam-jinrangna kenchakna nanganirang dongjana gita ia stadium-ni bidingo name sandirokchina gita Opposition dolni dilgipa Ronnie V Lyngdoh, NPP-chi dilenggipa MDA sorkariko didiangaha.
Ia a·selni bidingo magisterial inquiry dakchina sorkarini ge·etaniko ra·chakangengon, ia stadium-o hajalni hajal manderangko asongatanio maming kenchakna nanganirang dongjana gita name nipiltaichina Lyngdoh didiangaha.
“Manderangni janggian an·chingna pilakna bate gamchatbatani gimin ia stadium, baditana kingking naljokgipa ong·a, uko name audit ka·na nangenga. Ia stadium-ni bidingo sandirokanichi manderangni janggina kenchakna nanganirangko champengsona man·gen,” ine Lyngdoh aganaha.
Stadium-ni pakmarang be·aniko magisterial inquiry dakchina ge·etanina chakpaaniko parakatengon, magistrate-rangsa sing·sandianirangko dakna bil man·a ine Opposition dolni dilgipa talataniko on·angaha.
“Magisterial inquiry-ko dakna ge·etanio sorkari ong·akon dakaha maina uamangsa pilakkon sing·sandina bil man·gen. Iani bidingo Public Works Department (PWD)-ni official-rangkosa sandirokatgenchimode, ian technical gitasan ong·aigen aro uamangni sandie man·anirangba technical gitasan ong·e bon·aigen,” ine Lyngdoh aganaha.
PA Sangma stadium-ni be·aniko engineering-ni gimin u·i-ma·sigipa manderangchisa sandirokna nanga ine adita salrangna skangsan magisterial inquiry dakchina ge·etaniko Trinamool Congress (TMC) jegalatskaahachim ine nikna man·a.
