SHILLONG: Meghalaya a·doko Tourism-ni kamrangko tang·doatna kam ka·anio a·dokni Chief Minister Conrad K Sangma, Sukrobar salo, PRIME Tourism Vehicles scheme-ko a·bachengataha aro ia scheme-ko a·bachengatanio bol 16 Innova Crysta garirangko, dingtang dingtang tour operator-na pakwate on·angjolaha.
Ia scheme-ko a·bachengate on·anganio a·dokni Chief Minister, jinmana aganprakatengon, a·doko Tourism-ko tang·doatna kam ka·anio ia scheme-ba mingsa bak ong·enga aro ia garirangko tour operator-rangna pakwate on·anichi tourist-rangko nambate salrurana man·genok ine parakangaha.
Chief Minister-ni parakatani gitade, ia scheme-na sak 600-na baten manderang aro dingtang dingtang tour operator-rang dorgastorangko galaha aro ianoniko Tourism department, sak 50 manderang aro dingtang dingtang dolrangko seokaha.
Ia scheme-ni ning·o da·o bilsignina loan chotaniko man·chape 50 percent subsidy-ko sorkari on·enga ine talataniko on·engon, “Ia bilsini gisepon komibeoba bol 50 garirangko on·na miksongenga aro ia kamrang chu·sokbebegenchimode da·o bilsi bongani gisepon komibeoba bol 250 garirangko sorkari on·na man·gen,” ine Chief Minister parakataha.
Indake ong·genchimoba, ia garirangko jakkalanio baditana kingking chu·sokgipa ong·a uni krisa sorkari kamko ka·anggen aro ia kamrang chu·sokgenchimode da·o bilsi bongani gisepo garirangko bol 500-ona bariatani cholrangba donga ine Sangma talataniko on·angaha.
