SHILLONG: Marten jabol kal·chakramo expired ong·gimin ba somoi batgimin samrangko galgipani bidingo department-ni gita sandirokchina ge·etaniko on·aha ine Robibar salo, a·dokni Health Minister Ampareen Lyngdoh parakataha.
Lyngdoh-ni parakatani gitade, iani bidingo Directorate of Health Services (DHS), sandirokaniko dakanggen.
Shillong songjinmani Mawiong-o donggipa Marten jabol galchakramo gale donanggipa samrangara, dongimin somoina batgimin samrang ong·a ine talataniko on·angengon, somoi batgimin samrangko niamo pangchake galna gita dingtangmancha incinerator ba so·chakani biap dongachim ine Lyngdoh parakataha.
“Nanggitan somoirango on·na man·na gita a·dokona brebagimin samrangko central medical store-o donronga indiba COVID-19 sajinmani somoio, samrangko indita nangbrejahani gimin ia samrangko central medical store-on donchipna gita nangaha. Ia samrang, COVID-19 sajinmani somoirango jakkalchipjae da·o somoirang bataha,” ine Health Minister aganaha.
Central medical store-o gital ra·bagipa samrangko donna nangengahani gimin biaprang chakjae, ia gitcham samrangko galna nangengahachim ine janapatengon, iani bidingo gitcham samrangko galchina gita DHS (MI)-ni Central Medical Store-o pharmacist in-charge ong·enggipa mandena ge·etaniko on·aha aro uandaken ia pharmacist, ia gitcham samrangko galchina gita nangchakegipa official-rangna u·iataniko on·skaaha ine Lyngdoh parakataha.
Re·anggipa Bristibar attamo, gitcham samrangko Marten jabol galchakramo municipal truck garirangni galako Meghalaya Awaken Council Citizens (MACC) nikahachim aro ia samrangko Ganesh Das Hospital-oniko galahakon ine MACC-ni president Banshai Marbaniang, an·tangtangni chanchichipenganiko parakatahachim.