SHILLONG: Uniform Civil Code (UCC)-ni bidingo ku·pattianirangko on·china gita a·songo songdongenggipa manderangoniko aro dingtang dingtang dolrangoniko Law Commission am·engani gimin United Democratic Party (UDP)-ni gitaba iani bidingo ku·pattianirangko on·na da·o tariengaha ine u·iataha.
“A·songo songdongenggipa manderangoniko aro dingtang dingtang dolrangni ku·pattianirangko am·engani gimin chinga Law Commission-na on·na gita chingni ku·pattianirangko da·o matchotna siengaha,” ine UDP-ni general secretary Jemino Mawthoh parakataha.
UCC-ni bidingo a·dokni chadamberangna aro pilak manderangnan talatanirangko on·na man·na gita re·baenggipa July-ni 12 tariko UDP state youth wing-ni gita dingtangmancha inter-college debate competition-ko Bomfyle Road-o donggipa party office-o aro Laitumkhrah-o ong·atenga ineba Mawthoh parakataha.
India a·songara dingtang dingtang jat aro toromo bebera·giparangni meli nangrime songdong a·chaenggipa a·songsa ong·ani gimin Uniform Civil Code (UCC)-ara a·songni kosako re·ani gitasa ong·gen ine re·anggipa Sukrobar salosan, a·dokni Chief Minister aro National People’s Party (NPP)-ni national president Conrad K Sangma parakatahachim.
“NPP-ni nikaniode Uniform Civil Code-ara India a·songni kosako re·gipa niam gitasa ong·enga. Iako anga chingni party-ni nikanikosa aganenga,” ine Chief Minister aganahachim.
Indake ong·engon, BJP-ni a·songo ra·gatna sienggipa UCC-ara re·baenggipa 2024 bilsini Lok Sabha election-o BJP-kon ama man·atna sienga ine Opposition dolni dilgipa Ronnie V Lyngdoh parakatskaaha.
UCC-ara a·songo dingtang dingtang jat aro toromo bebera·giparangni tom·tome songdong a·chaaniko nisina sienggipa niamsa ong·ani gimin ia UCC-ko Congress dol raken jegalenga ineba ua parakataha.