SHILLONG: Adita salrangna skang, Common University Entrance Test (CUET)-ko ong·atanio Meghalaya a·dokni bang·bata chatro chatrirangkon, chel·a biaprangosa centre dake on·ahani a·sel chatro chatrirang bang·batan CUET-ko serikna man·tokjahani gimin a·dokni chatro chatrirangna CUET-ko sepiltaina cholko on·china aro a·doko CUET centre-rangko kulie on·china gita didie Mongolbar salo, a·dokni Chief Minister Conrad K Sangma, Union Education Minister Dharmendra Pradhan-ko New Delhi-o grongeaha.
“Common University Entrance Test (CUET)-ko sena gita gipin a·dokrangosa centre-ko on·ahani a·sel porikkako serikna man·gijagipa a·dokni chatro chatrirangna dingtangmancha CUET-ko ra·taina gita Education Ministry aro NTA-na ge·etaniko on·china chinga Union Education Minister Dharmendra Pradhan-ko mol·molaha,” ine Union Education Minister-ko grongani ja·man Sangma parakataha.
Re·anggipa June-ni 16 tariko ong·atanggipa CUET porikkako Meghalaya a·dokni chatro chatrirang bang·batan Jharkhand, West Bengal, Assam aro a·songni gipin biaprangosa sena donatako man·ahachim.
A·songni gipin biaprango sena donatako man·ahani gimin salgro salaram a·dokrangni chatro chatrirangnade CUET porikkako ra·doatna gita National Testing Authority (NTA) tik ka·angahachim ine nikna man·a.
Indake ong·engon, Meghalaya a·dokni dam 12 a·jarangon CUET centre-rangko kulichina gitaba a·dokni Chief Minister, Union Education Minister-ko didiangaha ine u·iataha.
“Ia kamna ma·mong sorkariko didina gita Shillong, Tura, Jowai, Nongstoin aro Williamnagar jillarangon gipin a·jarangkoba man·chapna altubatengani gimin ia jillarango CUET centre-rangko kulichengchina gita Union Education Minister-ko mol·molaha,” ine Sangma parakataha.
CUET-ni bidingo M’laya CM, Union Education Minister-ko gronge agangrika
Date:
Share post:
