SHILLONG: Reservation policy-ni bidingo a·dok sorkari da·o dipet expert committee-ko songna gita man·kujaenga, maina political party-rangan uamangni agan-ku·pattiani aro nangnikanirangko see-jote on·attokkuja, unigimin maio pangchake expert committee aro memborrangko songgen ine A·dok Sorkari mijalo parakataha.
Expert committee-ko songani koborko sing·on, “Expert committee-ko songani da·odipet mamingba dongkuja, maina chinga maming sing·ani aro ku·pattiarangkon chinga man·sokuja. Chinga maikae committee-ko songgen aro committee memborrangko seokgen? Ian sing·anirango pangchakesa ong·gen. Bebegita anga committee-ko songgenchimoba, uamang maio pangchake kam ka·gen, uaba mingsa neng·nikani ong·taigen” ine Cabinet Minister aro political party-rangni committee chairperson Ampareen Lyngdoh Butbaro aganaha.
Political party-rang, uamangni agan-ku·pattianirangko aro sing·anirangko see pakwatani ja·mansa expert committee-ko songoba namgni ong·gen, ong·jaode uamangara pangchake chanchianirangko dakgen ineba Lyngdoh aganaha.
Da·o dipet darang political party-rangba uamangni ku·pattiani aro nangnikanirangko see jote on·a dongkuja ine aganengon, “mitam political party-rangni songbatrango janapanirangkode nika indiba uarangara ku·jok mangmangasa, uarangkode anga ra·chakna man·jawa. Maiko agana, ukode anga ma·sina nanggen,’’ Lyngdoh aganaha.
Ua indakeba agana je, “anga bang·bata political party-rang baksaan agangrikataha aro kamrangko gong·rakatchina gitaba didiataha”.
Report-rangko pakwatchina gita political party-rangna sal somoiko tik ka·e on·a dongama ine sing·on, “bon·kamgipa tarikni gimin aganani katta dongja, jasa adha-na skangan anga u·iataniko on·manjok indiba da·alonaba maming kaman dongkuja. Angko maiko dakna nichakkua?” Lyngdoh aganchakaha.
Roster system-ko gitchamonin nipile ra·gatna nanga ine Garo Hills-ni presure group-rangni dabienba sal somoi on·gipani bidingo sing·anina aganchakengon, sal somoi manchie on·anide chong·motgipa rama ong·ja,sorkariko grongna nanga, maina sorkari pilak baksan agangrike kam ka·na ska, Cabinet minister aganaha.
Badiaba dolrangni, 15 percent reservation-ko dabigipani bidingo sing·anina aganchakengon, “sanaba 15% ko on·e sakoba watchanggalna ian angni kam ong·ja, committee memborrangsa uani gimin chanchigen. Indiba pilakni agananirangkon mikkang-ki·sang nigrike chanchianiko dakna angni gisiko chanchiani donga,” Lyngdoha aganaha.
