U·IATTIMGIPAONI
SHILLONG: Meghalaya a·doko rafting ba ring choaniko namdapatna miksonganio ‘Meghalaya Rafting’ program-ko Sukrobar salo, a·dokni Chief Minister Conrad K Sangma, Ri Bhoi a·jani Umtham songo donggipa Whitewater Village-o a·bachengate on·angaha.
Batanggimin bilsirangonin, Ri Bhoi Water Sports aro Tourism Cooperative Society, Meghalaya Canoe Association baksa Umtham songo kal·susaanirangko namdapatna kam ka·engachim ine nikna man·a.
Ia jolrango ring chona man·anirangko nike a·dok sorkari, dingtangmancha ‘Meghalaya Rafting’ program-ko ia songo a·bachengate on·aha.
Ring choe susaanirangko tang·doatna gita Ri Bhoi Water Sports & Tourism Cooperative Society aro Meghalaya Canoe Association, batanggimin somoirangoba national aro international sports-rangko ia Umtham songon ong·atahachim aro ia jolrango donggipa chadamberang da·o rafting ka·na skie ra·ahani gimin national aro international level-o ong·atenggipa susaanirangoba bakko ra·engahachim.
Ia ‘Meghalaya Rafting’ program-ko a·bachengate on·angani somoio a·dokni Chief Minister Conrad K Sangma, jinmana aganprakangengon, ring choaniko joltangni chadamberangna skie on·skaengani gimin dingtangmancha Ri Bhoi Water Sports & Tourism Cooperative Society-ko mittelpilangaha.
Ia kal·susaaniko namdapatna gita sorkari, chu·gimik dakchakanirangko on·gen ineba Chief Minister ku·rachakaniko on·angaha.
Ia jolrango donggipa chadamberangni ring chona changaniko nike, mikkangchi uamangan Meghalaya a·dokna mikkim rasongko ra·bana sienggiparang ong·a ineba Chief Minister aganaha.
