U·IATTIMGIPAONI
Shillong: Meghalaya-ni Chief Minister, Conrad K. Sangma, Sonibar salo Shillong Mayurbhanj Complex-o donggipa temporary campus-o National Law University (NLU)-ko oprakate on·angaha. Tom·anio Meghalaya-ni Chief Justice Sanjib Banerjee, Education Minister, Rakkam A Sangma, aro University-ni Vice Chancellor Prof Indrajit Dube-uamangba bak ra·angtokaha.
Tom·anio aganprakataon, Chief Minister Sangma, customary aro tribal law ba niamrangko taridapani bidingo gamchatani gimin aganaha. Indake gital a·bachengatgipa NLU-ko salgro-salaramni chu·gimik a·jolrango ja·rikgipa customary law aro niamrangni bidingo research ba am·sandianiko dakanio mongsonggipa biap ong·atna nangnikaniko janapataha.
NLU-ko songaniara Meghalaya d·okni legal studies aro research-o dal·bea dingtangniko ra·bagen. Batanggimin bilsi 50 somoirangonin a·doko namgipa institution dongjani a·selo legal system bang·a ra·bianirangko ba neng·nikarangko chagrongbaenga aro ja·manchakbeenga. Uni gimin NLU-ko songaniara, a·dokni legal system-ko namdapatgen ine CM aganaha.
Iarangni gisepon Chief Minister, sorkarini gital Education Policy baksa kam ka·na jotton ka·ani gimin u·iataha. Beben dingtanganiko ra·bana jotton ka·anio ba re·mikkanganio somoi nanga indiba sorkari, National Education Policy-ko gimik gital ja·ku de·anirango nangdimatna re·mikkangenga.
Sorkari, temporary campus-ko namdapatna ba infrastructure development-na kror 25 tangkako on·aha, jeoni kror 19-kode jakkalman·jok.
Uandake Meghalaya-ni Chief Justice, National Law University (NLU)-ko oprakatani tom·anio bakko ra·e aganprakmitingo, institution-ni gamchatani gimin aganangaha. Ian tribal law aro culture ba an·chingni daka-rika ba niam ja·rikanirangko u·idape ra·anio dakchakgipa ong·gen ine aganangaha.
Iarangni gisepon Education Minister Rakkam A Sangma-ba National Law University-ni a·doko dingtanganiko ra·banio mongsonggipa ong·gen ine aganaha. NLU, poraigiparangna a·dokni namgnina kam ka·anio uamangna nangnika tools, knowledge ba u·ianirangko on·gen ine aganaha.
