U·IATTIMGIPAONI
TURA: Reservation Policy-ni roster system-ko nipilani gnang ra·gatchina aro Tura-ko Winter Capital songchina dabie A·chik Conscious Holistically Integrated Krima (ACHIK)-ni membor-rang, Mongolbar sal dipet okumu chake jingjengataniko a·bachengatna tik ka·angaha.
Ia okumu chake jingjengataniko ACHIK-ni saksa dilgipa aro gitcham MCS officer Laben Ch Marak dilangenga aro sorkari aganchakaniko on·kujaskal okumu chake jingjengataniko dontongjawa ine ACHIK-ni general secretary Thomas M Marak parakataha.
Marak-ni parakatani gitade, 1972 bilsio Reservation Policy-ko ra·gatchengaonin A·chikrang, an·tangtangni bak rengsiko man·jahani gimin da·o A·chikrangna nangani kri kamrangko on·na man·na gita Reservation Roster-ko nipilani gnangsa ra·gatchina ACHIK dabiengachim indiba da·alonan sorkari, ACHIK-na iani bidingo maming aganchakanirangko on·kujaengachim.
Indita bilsirangna A·chikrangni bak rengsiko on·pilani bidingo da·onan a·dok sorkari maming chanchirimaniko dakkujaenga aro ian A·chik jatna namen kragijani ong·enga ineba ACHIK parakataha.
Sorkarini taridapgipa Office Memorandum-ko jegalatengon, ian A·chikrangna namgnirangko ra·baani pal batesa noksan ong·ataniko ra·bana sienga ine ACHIK-ni general secretary janapatenba, roster system-ko nipilani gnangsa ra·gatna nanga ine dabiangtaiaha.
Tura-ko Winter Capital songchina dabienggipani bidingo a·dok sorkari maming aganchakanirangko on·jaengani giminba ACHIK suk ong·gijaniko parakataha.
Indita bilsirangna Meghalaya a·dokko Garo Hills-onin chief minister ong·e dilahaoba Garo Hills-na maming namgniko ra·bana man·kujaenga ineba ACHIK matnangataha.
Indake ong·engon, ACHIK dolni okumu chake jingjengatanio Garo Hills-ni manderangkoba re·bae bak ra·echina gita ACHIK dolni dilgiparang mol·molataha.