U·IATTIMGIPAONI
SHILLONG: Meghalaya a·doko bijoli man·aniko bariatna gita Meghalaya sorkari aro National Thermal Power Corporation (NTPC)-ni gisepo Memorandum of Understanding (MoU)-o soi ka·grikangaha.
MoU-o soi ka·grikna gita tom·aniko New Delhi-o ong·atangaha aro ia soi ka·grikanio, a·dokni Chief Minister Conrad K Sangma, a·dokni Power Minister Abu Taher Mondal, NTPC Limited-ni Chairman aro Managing Director Gurdeep Singh baksana Meghalaya Energy Corporation Limited (MeECL)-ni Chairman aro Managing Director Sanjay Goyal-ba dongpaaha.
NTPC baksa soi ka·grikani bidingo talataniko on·angengon, Power Portfolio Management Services (PMS) MoU-o Meghalaya sorkari aro NTPC Limited-ni soi ka·grikaniara Meghalaya Discom-ko chalaina gita kamrangko nambatatenba, manderangna bijoliko nambate on·na man·gnok ine a·dokni Chief Minister Conrad K Sangma parakataha.
Chief Minister-ni parakatani gitade, ian MeECL-ko changgipa sapgipa manderangchi chalaina aro MeECL-ko chalaianio NTPC-ni bilrangko jakkalna miksonge soi ka·grikaniba ong·aha.
Ia MoU-rangara Pump Storage Power Plant (PSP)-rangko nambatatna aro Meghalaya a·doko Floating Solar project-rangko donan baksana a·dokni chonchongipa hydro project-rangko dake nina miksonge soi ka·grikaniba ong·aha ine janapatengon, NTPC baksa MoU-o soi ka·grikanichi a·dokni pilak biaprangon bijolini kamrangko namdapatna man·gnok ine Chief Minister parakataha.
Meghalaya a·doko bijoli man·aniko bariatna gita ia sorkari on·kange kamko ka·engani gimin ia MoU-o soi ka·grikanichi a·doko bijoliko bariatna dakchakani ong·gnok ineba ua parakataha.
NTPC baksa MoU-o soi ka·grikani bidingo a·dokni Power Minister Abu Taher Mondal-ba janapatengon, dolgni bakrimanichi Meghalaya a·doko bijolini gita neng·nikanirangko namatna man·gnok ine an·tangni ka·dongchakenganiko parakangaha.
