U·IATTIMGIPAONI
TURA: Reservation Policy-ni roster system-ko nipilani gnang ra·gatchina aro Tura-ko Winter Capital songchina dabie A·chik Conscious Holistically Integrated Krima (ACHIK)-ni membor-rang, gipin dolrang baksa bakrime Mongolbar sal dipet, Tura-ni Mini Secretariat mikkango okumu chake jingjengatangna a·bachengataha.
Ia okumu chake jingjengataniko ong·atani bidingo ACHIK-ni general secretary Bernita R Marak, kobor ra·timgiparangna talate on·angengon, 1972 bilsio Reservation Policy-ko ra·gatchengaonin A·chikrang, an·tangtangni bak rengsiko man·jahani gimin da·o A·chikrangna nangani kri kamrangko on·na man·na gita Reservation-ni roster-ko backlog policy ba skangonin nipilani gnang ra·gatchina dabie ia okumu chake jingjengataniko dakenga ine parakataha.
Indita bilsirangna A·chikrangni bak rengsiko on·pilani bidingo da·onan a·dok sorkari maming chanchirimaniko dakkujaenga aro ian A·chik jatna namen kragijani ong·enga ineba Marak parakataha.
Roster system-ko backlog policy-o ra·gatchina dabienggipani bidingo sorkari da·onan A·chikrangnade maming ku·rachakanirang dongkujaenga ine janapatengon, ian roster system-ko mikkangchina ra·gatna gita sorkarini manchianiko mesokani ong·enga ine ACHIK-ni general secretary suk ong·gijaniko parakataha.
“Meghalaya a·dokni bilsi 50 gapanio A·chikrangna dongimin bak rengsiko gipin jatrangsa man·e kataha aro A·chikrangde an·tangtangna tikatgimin mipalkon man·e cha·pajahani giminsa Reservation-ni roster-ko backlog policy-o ra·gate A·chikrangni man·na nangkuenggipa bak rengsiko on·china chinga dabienga. Ian A·chikrangni man·na nanggniko dabianisan ong·enga,” ine Marak aganaha.
Ia jingjengataniko ong·atani bidingo ACHIK-ni saksa membor aro gitcham MCS officer Laben Ch Marak-ba kobor ra·timgiparangna talate on·angengon, a·dokni Chief Minister aro gipin dilgiparangko uamang gronge agangrikna jotton ka·ahachim indiba da·alonan uamangko gronge agangrikna man·kuja aro uamang sorkarioni maming aganchakanirangkoba man·kujaenga ine suk ong·gijaniko parakataha.
Roster system-ko ra·gatani bidingo Chief Minister aro a·dokni gipin dilgiparang, Garo Hills-ni manderangna name talate on·na nanga ineba Marak dabiangaha.
Iani bidingo sorkari maming aganchakaniko on·kujaskal okumu chake jingjengatangkugen ineba ACHIK-ni dilgiparang parakataha.