U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election-o Congress dol, Shillong-ni Lok Sabha MP aro Meghalaya Pradesh Congress Committee (MPCC)-ni president Vincent Pala-kon Shillong Parliamentary constituency-o susaattaina tik ka·angaha.
Iani bidingo kobor ra·timgiparangna u·iatengon, Shillong Lok Sabha seat-na candidate-ko seokani bidingo Congress dolni dilgiparang tom·e chanchirimangaha aro da·o ong·enggipa MP-nan tikitko on·taiani cholrang donga ine Budbar salo, Congress Legislature Party (CLP) aro Opposition dolni dilgipa Ronnie V Lyngdoh parakataha.
MPCC-ni president Pala an·tangan da·o dipet Shillong-ni Lok Sabha MP ong·engoba Meghalaya a·doko uni dilanichi Congress dol chu·sokgipa ong·na man·skajaengachim maina ia bilsini a·bachengachibara ong·atanggipa Assembly election-oba Congress dol, a·dokni dam 60 seat-rango susaaoni dambongakosan chena man·aiahachim. Assembly election-o Pala an·tangba Sutnga constituency-oni susaahachim indiba chu·sokgipa ong·na man·jahachim.
Garo Hills-na candidate-ko seokani gimin janapatskaengon, Tura Parliamentary seat-o susaatna gita dorgastorangko ra·gen aro gisiko nanggipa Congress membor-rangde dorgastorangko galna man·gen ine Lyngdoh parakataha.
Tura-o da·o dipet National People’s Party (NPP)-ni Agatha K Sangma, Lok Sabha MP ong·engachim ine nikna man·a.
2024 bilsini election-o Congress dol, a·dokni gitcham minister Deborah Marak-ko Tura Parliamentary constituency-o susaatna miksongenga ine jangbingbangenggipani bidingo sing·on, uaba dorgastoko galna man·aigen ine CLP-ni dilgipa parakatskaaha.
Lok Sabha election-o Congress dol, NPP baksa bakrime kam ka·anirang dongjawa ine talataniko on·angengon, NPP-chi dilenggipa MDA sorkario BJP dongenga dipetde Congress, a·doko NPP baksa kamko ka·rimna man·jawa ine Lyngdoh parakataha.
