U·IATTIMGIPAONI
SHILLONG: East Jaintia Hills a·jao skigiparangni attendance-ko ra·na gita Uniattendance (UBI) app jakkalaniko dingtang dingtang skigiparangni dolrang jegaltokengon, East Jaintia Hills a·jao mitam skigiparang kamrangchi re·chipgija dongenga ine badi ka·anirangko man·soahani giminsa UBI app-ko a·bachengataha ine East Jaintia Hills a·jani Deputy Commissioner Abhilash Baranwal parakataha.
Deputy Commissioner-ni parakatani gitade, mitam skigiparang an·tangtang kamchi re·gija chu·onga gita lekka pora donggijagipa manderangkosa an·tangtangni biapo watskaenga ineba ua badi ka·anirangko man·soahachim.
UBI app jakkalaniko ra·galpilani katta dongjawaha ine talataniko on·angengon, “East Jaintia Hills a·jani skulrango UBI app-ko a·bachengata intalan skigiparangko skulrango nikengahani gimin bang·bata songni nokmarang aro manderangba district administration-ko mitteltokenga. Skigiparang an·tangtangan da·o skulrangona re·baengahani gimin chel·a biaprango donggipa chatro chatrirangba da·o skulchi gisik nangbate re·tokengaha,” ine Baranwal parakataha.
Indake ong·engon, East Jaintia Hills a·jani dingtang dingtang sorkari department-rangoba ua UBI app-ko jakkalna miksongenga ine Deputy Commissioner parakataha.
Ia UBI app-ko Education department-onide ong·ja indiba district administration-onisa ra·gatahani gimin skigiparang iako ra·chakna man·jawa ine adita salrangna skangsan skigiparang, East Jaintia Hills a·jao UBI app ra·gataniko jegalattokahachim ine nikna man·a.
