U·IATTIMGIPAONI
SHILLONG: Re·anggipa Budbar salo, Meghalaya a·dokni damgittam Autonomous District Council (ADC)-rang, Khasi Hills Autonomous District Council (KHADC)-ni conference hall-o tom·e chanchirimangenba, Sixth Schedule a·jarango Uniform Civil Code (UCC) ra·gataniko jegalna gita India-ni Law Commission-na sedoatna tik ka·angaha.
ADC-rangni tom·a matchotani ja·man kobor ra·timgipa manderang baksa agangrikengon, Sixth Schedule a·jarangoba UCC-ko ra·gatgenchimode district council-rangna on·gimin bilrangko aro mongsongbate jatni daka rikani aro bebera·anirangko pe·ani gita ong·gen ine KHADC-ni Chief Executive Membor (CEM) Pyniaid Sing Syiem parakataha.
“Uni gimin chinga Sixth Schedule a·jarangode Uniform Civil Code-ko ra·gatjachina gita Law Commission-na sedoatna tik ka·angaha,” ine Syiem aganaha.
Uamang July 14 tariko, a·songni Law Commission-na iani bidingo sedoatgen ineba KHADC-ni CEM parakataha.
Indake ong·engon, United Democratic Party (UDP)-ba Uniform Civil Code-ni bidingo an·tangtangni nikani aro chanchianirangko Law Commission-na sedoatgen ine UDP-ni working president aro a·dokni Cabinet Minister Paul Lyngdoh parakataha.
UDP-ni gita UCC-ni bidingo inter-college debate ba jera ra·susaaniko ong·atenga ine janapatengon, ia debate-ko ong·atani ja·man, uamang UCC-ni bidingo memorandum-ko seenba Law Commission-na on·atgen ine Lyngdoh parakataha.
