U·IATTIMGIPAONI
SHILLONG: Meghalaya a·doko Inner Line Permit (ILP)-ko ra·gatchina aro Garo/Khasi ku·sikrangko Constitution-ni Eighth Schedule-o ra·gatchina gita a·doko songdongenggipa manderang aro dingtang dingtang dolrang dabitokengon, iani bidingo a·songni Prime Minister Narendra Modi aro Union Home Minister Amit Shah baksa agangrikna gita a·dokni Cabinet-ko Chief Minister Conrad K Sangma, New Delhi-ona dilanggen.
Iako Sukrobar salo, ILP-na dabie aro Khasi-Jaintia Hills jolrangona rel gari ra·napbaaniko jegale Hynniewtrep Youth Council (HYC)-ni membor-rang Secretariat a·palo jingjengatangani ja·man, a·dokni Deputy Chief Minister Prestone Tynsong parakataha.
Deputy Chief Minister-ko grongani ja·man kobor ra·timgipa manderang baksa agangrikengon, Jaintia Hills a·jaona rel garirangko ra·baskagen ine Chief Minister-ni aganahani giminsa jegale da·alo jingjengataniko dakangaha ine HYC-ni-ni general secretary Roy Kupar Synrem parakataha.
A·doko songdongenggipa Tribal-rangko chel·chakna gita a·doko maming niamrang dongjani giminsa uamang rel gari ra·baaniko jegalsoenga ine talataniko on·angengon, Deputy Chief Minister-ko gronganio uamang, ILP-ko ra·gatna gita Meghalaya Assembly-o pass ka·gipa resolution, Khasi aro Garo ku·sikrangko Eighth Schedule-o napatchina dabienggipani gimin aro Meghalaya Residents Safety & Security Act (MRSSA)-ko taridapgipani bidingoba sing·sandiangaha ine Synrem parakataha.
Indake ong·engon Synrem-ni parakatani gitade, da·o dipet Khasi aro Jaintia Hills-ona rel garirangko ra·bana gita maming miksonganirang dongja aro iani bidingo Cabinet chanchirimaba dongkuja ine Deputy Chief Minister, uamangna talataniko on·ataha.
ILP aro Khasi-Garo ku·sikrangko Eighth Schedule-o ra·gatchina dabienggipani bidingo janapatskaengon, Parliament-ni Monsoon Session-ko ong·atengmiting somoio a·dokni chu·gimik Cabinet, New Delhi-ona re·ange Prime Minister, Union Home Minister aro gipin minister-rangko gronge agangrikegen ine Tynsong ku·rachakaniko on·ataha ine HYC parakataha.