ACHIK-ni jingjengata sal 7 gapjok, ka·dongatako man·kuja dipetna dontongkujawa  

Tura: Garo Hills a·joloni NGO-rang aro manderang Sombar salo Achik Holistically Integrated Krima (ACHIK)-ni Tura, SMELC building-o okumu chake jingjengatanio bakrimeaha, ian jingjengatenggipa dolna ka·donganiko on·aha.
ACHIK, Reservation System-ko nipiltai ra·gatchina aro Tura-ko Winter Capital songchina dabienga. Jekon bilsi 50 skangan an·chingni gitcham dilgiparang nikjumangaha.
ACHIk aro Garoland State Movement Committee (GSMC), United Garo People’s Forum (UGPF) baksa bakrime July 11 tarikoni okumu chake jingjengataniko a·bachengataha. Ja·man AAYF, NIKSAMSO, ASWA, TGCSU dolrangba bakrimpaaha. Una agreba jolni buchuma budeparang, New Tura Development Forum (NTDF)-ni gita bakrimaha. Jingjengataniko a·bachengao bang·gija chakpagiparangsan dongachim, indiba sal batangroro bang·bate manderang okumu chake jingjengatao bakrimeaha.
Minggipin okumu chake jingjengatanio BJP Mahila Morcha-ba bak ra·paenga. Uamangba mnisaloni bak ra·paeaha.
“Ian political-ni mamla ong·ja, indiba ian songsal baksa  nangdimgipa ba songsalna nangchakgipa biding ong·a. Tura-o Winter Capital-ko donchina ba songchina dabianiara gital ong·ja, an·chingni gitcham dilgiparangan iako Garo Hills-na ku·rachakahachim indiba chu·sokatna man·angjaha. Uni gimin iani bidingo kam ka·na nangenga, uni giminsa chingaba chingni jong-ada, no/abirangna chakpaana re·baaha. Batanggimin salrango chingni  man·a nanggnirangko chinga man·jaha, una chinga da·o chadengenga,” ine morcha-ni president Rakkhi Sangma aganaha.
Indake Garo Hills a·jolni manderang gimikkon ia re·mikkanganio chakpachina didiangaha.
Garo National Council (GNC)-ni gitcham MDC Augustine Marak-ba jingjengatanio bak ra·pae, Winter Capital-na dabianio bakrimaha. Una agreba Sombar salo Tura BJP MDC Bernard Marak-ba bakrimeaha.
“Jingjengatgipa dolrang namgipa ja·kuko de·enga, songsalni namgnina chanchie kamko ka·enga, uamang baksa anga chadengpaa. Aro Sorkariko mikkangona re·bae agangrikako nangnikenga” ine Bernard aganaha.
“Garo Hills-oni darang ge·saba NGO-rang kamko man·giminrangni kamko ra·sekna ba gimaatna nangnikja, indiba skang salrango je ong·gija kamrangko ka·aha, uko nipiltaianikosan nangnika” ine ACHIK aganaha.
Indake ong·engon jingjengatani antisa gappilomangba da·onan district administration aro sorkarini sandi-nirokea dongjani gimin ACHIK-ni dilgipa saksa Bernita sing·ataha.
“Ardent Bassoiwmot-ni jingjengatmitingode salgittamni gisepon minister-rang aro chakpagiparang uni an·seng-baljokaniko nirokna sokangtokahachim. Indiba chingni obosta namen dingtanga, chingko darangba nirokna sokbaja, chinga siama tangengama, darangba simsakja. Sorkari, Opposition-oni darangba sing·egipaan dongja.”
Jingjengatgiparang batanggimin salsnioni mamingko cha·gija jingjengatanio bak ra·tokenga, indaken obosta ong·angkua ong·ode, jingjengatgiparangni be·en -bimang namjabatanggnok.
Sombar atam 3.45 bajio West Garo Hills-ni deputy commissioner Jagdish Chelani, jingjengatgipa biapona re·ange, jingjengataniko dontongna mol·moleaha.
Dilgiparang baksa agangrikmitingo DC, sorkarini gita representative ong·e re·baaha ine agane jingjengataniko dontongchina mol·molaha. Indiba CM-oni ka·dongataniko man·kuja dipetna uamang dontongna jechakaha.
Kamo jachakgija ong·engani gimin CM, re·bana man·jaha indiba jingjengatgiparangni gimin salantian sing·rokenga ine DC, u·iataha. CM, mikkang antirangonsa re·bana choljokgen indiba jingjengatgiparang je somoioba Shillong-o uko gronge agangrikna aro phone-o agangrikna man·aigen ineba aganaha.