SHILLONG: A’chik Conscious Holistically Integrated Krima (ACHIK)-ni Tura-ko Winter Capital songchina dabianiko dal·e ra·na nangja ine Cabinet Minister, Ampareen Lyngdoh Mongolbaro aganaha.
ACHIK-ni dabigipani bidingo koborni manderangna aganengon, ia indakgipa dabianirang knachakna kragipa ong·ja ineba Lyngdoh aganaha.
Manderangko administration-ona sepangbatatna gita Sorkari block-rangko bang·en songaha, Chief Minister July 24 tariko Garo Hills-ona re·anggen aro jingjengatenggipa dolko gronge agangrikgen, Minister aganaha.
“Angni an·tangni chanchiani gitade ia dabianirangko knachakaniko nangnikja. Bebegita, spring, autumn, winter, monsoon Session-rangko ong·atode gimikon capital-rang donggnok, unode administration-an dakgni chong·mokon jaktuatgen ine anga chanchia,” Lyngdoh aganaha.
Meghalaya indinan ma·eke donggipa district-rangko nangrimate rikgipa a·doksa ong·a, da·o sakantian winter Capital Hill ba spring capital-ko dabitokode pilakan ong·gijaona sokanggen, Minister aganaha.
“Dabianiko knachangode, an·chingna sason ka·anio neng·nikaniko man·gen. Pilak MLA aro Minister-rang, dingtang dingtang district-rangona na·simangni neng·nikanirangko nirokna gita re·angtokenga. Na·simangni nanganirangko simsakna aro sason ka·anio na·simangko watchanggalja ine na·simangna u·iatna gita uamang re·angtokenga, indiba iano summer capital, uano winter ba spring capital dake donnade chinga man·ja. Iade ong·manchaja” ine Ampareen Lyngdoh agana aroba CM-ni re·angao iani bidingo ma·sigen ine ka·donga ineba ua agandapaha.
