SHILLONG: Adita salrangna skang, Tura-ni Chief Minister’s Officer (CMO)-ko manderangni jinma ro·ongrangchi goe chadrapanio, a·dokni Chief Minister-na kenchakna nanganirang donggenchimoba nanga gita chel·chakanirangko on·na man·jahani gimin West Garo Hills Police-rangni kamko Congress dolni MLA Saleng Sangma sing·doataha.
Tura-o ong·anggipa a·selko jegalatengon, batanggimin somoioba a·dokni gitcham Education Minister Ampareen Lyngdoh-ni Tura-ona dingtang dingtang dolrang baksa tom·e agangrikna re·baengmiting somoio da·o gita kenchakna nanganirang dongahani a·selan DC aro SP, Jengjal-oni watatpilaha aro ian police-rangni kamo olgrokaniko mesokani ong·enga ine Sangma parakataha.
“Tura-o so·sojengjeng ong·engmitingo maibakae Chief Minister saknaanirangko man·na nanggenchimode mai ong·genchim? Iandakgipa obosta ong·ode haida police-rang gochakna nangaon ga·aknaba gnangchim,” ine Sangma aganaha.
Ia a·selko ning·tue sandirokchina gita police-rangko didiatengon, badiaba manderangni iandake so·sojengjeng ong·atani a·sel Tura-ko Winter Capital songchina dabianikoba nisigalaha ine Congress MLA, suk ong·gijaniko parakataha.
“Ia a·selni gimin an·ching political dolsankode matnangna man·jawa. Tura-o iandakgipa obostarang ong·enga ine ma·sisoahaon police-rang, CM sokangna skangan nanga gita chel·chaksoanirangko dakna nangachim,” ine Sangma aganaha.
So·sojengjeng ong·atani kamrangchide maming kamrangon chu·sokna man·jawa aro pangnan noksan ong·nasa nangaigen ine talataniko on·angengon, Garo Hills-o Winter Capital-ko songna dingtang dingtang dolrangni dabiani da·o badiaba manderangni a·sel indin ong·grama gita ong·aiaha ine Sangma parakataha.
Opposition dolni dilgipa Ronnie V Lyngdoh-ba ia a·sel ong·aniko raken jegalataha aro ian manderangko chadrapani gitasa ong·aha ine parakataha.
