TURA: Garo Hills Autonomous District Council (GHADC)-o ong·atenggipa session-ko maming a·sel aro talatani gri Deputy Chairman-ni dontongatahani gimin Rongrong-ni MDC Rinaldo K Sangma, suk ong·gijaniko parakataha.
Sangma-ni parakatani gitade, GHADC-ni session-ko maming talatchengani gri Deputy Chairman-ni dontongatahani a·sel session-o bak ra·paenggipa Opposition MDC-rang namen aiao inmantokaha.
Maming a·sel gri session-ko dontongatani gimin opposition MDC-rang sing·on, Tura-o ong·enggipa obostarangkosa Deputy Chairman pa·sikaiaha ineba Sangma, suk ong·gijaniko parakataha.
Sombar salo, Tura-ni Chief Minister’s Office (CMO)-o so·sojengjeng ong·anggipani bidingo janapatengon, da·o Tura jillao obostarang namangpilahani giminan dokkan, office, skul aro pilak institute-rangkon kulipilchina gita district administration-ba ge·etaniko on·pilahachim ine Rongrong MDC parakataha.
“Salgnina ong·atgipa session-o Question Hour baksana Motion aro Resolution session-rangkoba on·jahani gimin session-ni salko ra·dodapatchina anga Deputy Chairman-ko mol·molahachim indiba nangchongmotgipa kamrangni gimin chanchirimna kena gita Treasury Bench, session-oni ong·kate kataha,” ine Sangma parakataha.
Rongrong MDC-ni parakatani gitade, niam gri koela badinganio CEM-ni jak dongpaani, kam ka·giparangna dormaharangko on·ani, Uniform Civil Code (UCC)-o nangchakegipa kamrang, 15th Finance Commission aro uandakgipa dingtang dingtang kamrangni gimin ia chetgipa session-o Opposition MDC-rang sing·na nanganirang bang·en dongachim indiba iandakgipa nangchongmotgipa kamrangni gimin chanchirimna cholko on·gija GHADC-ni NPP Executive Committee, session-ko dontongataiahachim.