TURA: Tura jillao so·sojengjeng ong·angani ja·man da·o tom·tomaniko man·piltaiahani gimin Tura jillao ra·gatgipa Section 144 CrPC-ko West Garo Hills a·jani District Magistrate, July 28 tarik pring 5:00 bajioni ra·galatpilaha.
Tura-o so·sojengjeng ong·aniko nirokna gita BSF dolni sipairangkoba rimbaahachim aro da·o obostarang namkalangahani gimin BSF dolni sipairangkoba da·o District Magistrate watpilataha.
Tura-ko Winter Capital songchina aro Reservation Roster-ko backlog policy gnang ra·gatchina dabienggipani bidingo a·dokni Chief Minister Conrad K Sangma, re·anggipa Sombar attamo, ACHIK, GSMC aro uandakgipa dingtang dingtang dolni dilgiparang baksa Tura-ni Mini Secretariat-o tom·e agangrikengmiting somoio badiaba dolni manderang rang·san so·sojengjeng ong·atahani gimin Tura jillao Section 144 CrPC-ko ra·gate walantian 9:00 bajioni pring 5:00 bajiona curfew-ko ong·atangahachim.
Indake ong·genchimoba, da·o obostarang namangahani gimin aro tom·tomaniko man·piltaiahani gimin West Garo Hills a·jani District Magistrate, Tura-o ra·gatgipa Section 144 CrPC-ko ra·galatpilaha.