M’laya, gipin a·dokrang baksa nangdimaniko bilakatna ma·mong baksa bakrime ja·ku de·enga: CM

Shillong: Sonibar salo Commonwealth Parliamentary Association India Region-ni chang 20-gipa annual conference-ko ong·atao bakko ra·mitingo Chief Minister, Conrad K. Sangma, aganprakatengon, ‘Northeast India, mongsongbate Bangladesh baksasan badingchiwalaniko daka, gipin songsul a·songrang jekai- Bhutan aro Myanmar baksade komia, bading-chiwalani donggenchimoba border point gitasa ong·aia’ ine aganaha.
“India-ni institutional forums, Bay of Bengal Initiative for Multisectoral Technical and Economic Cooperationa aro South Asia Sub regional Economic Cooperation (SASEC) program-o Meghalaya, ja·lang dake kam ka·gipa ong·a,” ine Sangma aganaha.
Bangladesh baksa nangdimani gimin janapataon, “Meghalaya, border area ba sima jolrango bading-chiwalaniko namdapatna ja·ku de·enga. Ja·ku de·anio Border Infrastructure-ko namdapatna Integrated Check Points (ICPs)-ko Land Custom Station aro Border Haats-o songgen.
Dawki-Bholaganj Road aro Tura-Dalu Road ba ramako namdapataha. Economic activity ba kamrangko namdapatna check post aro border haats-o songenga.
Meghalaya a·dokko gipin a·dokrang baksa nangdimatna ming 18 mongsonggipa road project-rangko a·bachengataha ineba Chief Minister, aganaha.
Uandake West Bengal-ona neng·nikgija jol sokna ba nangdimatna Mahendraganj gita ramako tarikna miksongenga, ian km 600 ramako km 85-ona komiatgen aro bading-chiwalaniko bilakatgen.
“Da·ororo jaantion Shillong-oni sak 10,000 passenger ba songregiparang gipin dingtang dingtang a·dokrangona jekai- Delhi, Koltaka, Aizawl, Agartala, Imphal, Dimapur, Dibrugrah aro Guwahati-ona songretokenga. India sorkarini dakchakanichi chinga Shillong Airport-ko namdapatna jotton ka·enga.”
Shillong Airport-ko International Airport parakatchina, Chief Minister, Civil Aviation Ministry-ko mol·molataha, jedakode gipin a·dok aro a·songrang baksa nangdimna man·gen aro Act East Policy-ko bilakatgen ine CM, u·iataha.
Uandake CM Sangma, Prime Minister aro ma·mong sorkariko Gati Shakti, UDAN, infrastructure development ba uandakgipa dingtang dingtang programrangko a·bachengatanina mittelataha.
“Minggipin Meghalaya a·dokoara gam gnangbegipa a·dok ong·a baksa a·bri jol ong·ani gimin chi bana, a·a ruronga, balminduri, banggria ba uandakgipa ong·telaigipa a·selrang ong·na altua, iarangara development ba namroro-silroroani kamrangko ja·manchakata, uni gimin iani bidingo kam ka·na nangenga.”
Iarangni gisepon Meghalaya sorkari, North Eastern Space Applications Centre (NESAC), Department of Space, India sorkari baksa bakrime, chi bana, a·a ruronga, goera goa iandakgiparango warning alert system ba mikratsoani bidingo kam ka·enga, ine CM aganaha.