SHILLONG: Meghalaya a·doko gital National Education Policy (NEP) 2020-ko ra·gatanio meligrikgijanirangko nikna man·engon, iani bidingo State Higher Educational Council, NEHU-ni Vice Chancellor aro gipin institute-rang baksa tom·e chanchirimtaina sienga ine Mongolbar salo, a·dokni Education Minister Rakkam A Sangma parakataha.
NEP 2020-ko ia 2023 bilsionin ra·gatna gita NEHU-ni tik ka·ani bidingo HYC aro NEHUSU-ni dilgiparang, uko grongeanio iako a·dokni Education Minister parakataha.
Education Minister-ni parakatani gitade, a·songni pilak biaprango donggipa gipin university-rang ia gital NEP-ko ra·gatahani gimin Meghalaya a·doko ia gital NEP-ko ra·gatjagenchimode a·dok watchanggalako man·gnok.
State Higher Educational Council, re·baenggipa August-ni 10 ba 11 tariko tom·aniko ong·atna sienga ine janapatengon, ia bilsion a·doko NEP 2020-ko ra·gatja ong·ode gipin a·dokrango poraina sienggipa Under Graduate chatro chatrirangde admission-ko ra·na gita bilsisa sengdapkuna nanggnok maina gipin university-rangde NEP-ko ra·gattokengaha aro ia policy-ni ning·o Under Graduate course-rang bilsibri ong·gnok ine Sangma parakataha.
HYC-ni jajrengchakaniara ong·a ine janapatskaengon, NEP-ko NEHU-ni hybrid mode-o ra·gatna miksongengani giminsa HYC, jajrengchakaniko parakeaha ine Education Minister parakataha.
Iana skang, Education Minister-ko grongeani bidingo kobor ra·timgiparangna talate on·angengon, NEHU-ni ning·o donggipa mitam college-rang ia gital NEP-ko ra·gatna taritokahaoba mitam college-rangde dingtang dingtang neng·nikanirangko chagrongna nangkuengani a·sel ia gital NEP-ko ra·gatna tarikuja ine paraktokengani gimin ian a·dokni gisepo jajaani ong·kuenga ine HYC-ni president Robertjune Kharjahrin parakataha.
Ia gital NEP-ara policy-sa ong·ani gimin academic council-ni ra·chakaniko nangchenggen aro executive committee an·tangaride ia NEP-ko ra·gatna man·jawa ineba Kharjahrin parakataha.
NEHU-ni academic council-ko ta·raken iani bidingo tom·e chanchirimchina dabiangengon, iani bidingo jegale jingjengatenggipa college-ni skigiparangkoba okame, uamangni nangnikanirangko knatime ra·china gita HYC, NEHU-ni VC-ko didiangaha.