SHILLONG: Meghalaya Public Service Commission (MPSC)-ni service rules-ko Budbar salo, a·dokni Cabinet ra·chakangaha.
MPSC-ni service rules-ko ra·chakani bidingo talate on·angengon, MPSC-ko indita bilsirangna chalaiahaoba commission-o kam ka·giparangna service rule-rang dongkujachim aro da·alo MPSC-ni service rules-ko Cabinet ra·chakangaha ine a·dokni Chief Minister Conrad K Sangma parakataha.
Ia apsan salon, 1987 bilsini Meghalaya Medical Council Act-ko taridapna gitaba a·dokni Cabinet, dingtangmancha ordinance-ko pass ka·angjolaha.
“Skangode Medical Council of India, MCI dongachim ine an·ching pilakan ma·sia aro Meghalaya Medical Council Act-o ‘MCI’ kattaba dongkuengachim. Indiba da·o MCI-ko dingtangate National Medical Commission inesa mingskaahani gimin Meghalaya Medical Council Act-o ‘MCI’ kattakoba taridapna nangenga. Iana Cabinet da·alo dingtangmancha ordinance-ko pass ka·aha,” ine Chief Minister parakataha.
