SHILLONG: Bristibar salo, Inland Waterways Authority of India (IWAI)-ni skanggipa tom·aniko Shillong-o ong·atangenba, koela aro uandakgipa a·ningni bosturangko chi ramarang gita gipin a·songrangona watani bidingo chanchirimangaha.
A·ningni bosturangko maikai komibata damrango chi ramarang gita gipin a·songrangona watatna man·gen, uarangni bidingo IWAI-ni official-rang, ia tom·anio chanchirimangaha.
IWAI-ni IRS Member (Traffic & Logistics) Vinayak Azaad-ni parakatani gitade, Assam-o a·ningni bosturangko watenggipa Pandu aro Dhubri chi ramarangkoba Meghalaya a·dokni bosturangko watanio jakkalna man·gen.
Ia chi ramakon Indo-Bangladesh Protocol (IBP) rama gita jakkalenga aro ia rama gitan India a·songni mongsonggipa biaprangonaba rama gita jakkalenga ineba Azaad parakataha.
Bosturangko watna gita a·dokni chi ramarangko jakkalani bidingo name sandichengna nanggen ine janapatengon, bostu salgipa jahasrangko badia chi ramarang gita watna jakkalrongbata, uarangko see on·china uamang a·dok sorkariko mol·molataha ineba IWAI-ni official parakataha.
“Sorkarini see on·aniko man·ahaon chinga chingni gitaba name am·sandianirangko dakna man·gnok aro cholrang ong·genchimode ia ramarang gita Meghalaya-oni Bangladesh-ona bostu salgipa jahanrangko watna a·bachenggnok,” ine Azaad parakataha.
Ia tom·anio koela badinggipa mitam manderangba dongpae bakko ra·angtokahachim.
A·doko koela badingenggipa saksa Sajay Laloo-ni parakatani gitade, ia project-ko tang·doatna man·ahaode chi rama gita bading chiwalanio korosrangko komiate a·dokna namgnirangko ra·bana man·gnok.