SHILLONG: Meghalaya a·dokona National Highway (NH) ramarang gita matchu salbaaniko Assam sorkari champengrongengani gimin Meghalaya sorkari, suk ong·gijaniko parakataha.
Meghalaya a·dokona matchu salbaengako Assam official-rangni champengsorongengani gimin a·dokni Animal Husbandry & Veterinary Minister AL Hek suk ong·gijaniko parakatengon, Assam a·dokosa matchu salruraaniko champengengnaba gnang indiba Meghalaya a·doko matchu badingenggipa manderangde, gipin a·dokrangoni matchurangko salbana gita national highway-rangko jakkalna nangenga ine parakataha.
“Chinga national highway-rangkosa jakkalenga aro badiaba a·dokni ramarangkode jakkaljaengachim. National highway-rangde badiaba a·dokni rama ong·ja indiba a·songo songdongenggipa pilak manderangnin ong·a. Meghalaya a·dokni national highway-rang gita manderangni re·ruraani ba bostu salruraaniko Meghalaya a·dokba champengna man·ja,” ine Hek aganaha.
Iani bidingo ua Assam-ni chief minister aro Animal Husbandry & Veterinary minister baksa agangrikatmanaha ineba Hek parakataha.
