SHILLONG: Assam aro Meghalaya a·dokni simarango golmalrangko namatna gita kam ka·anio a·dok damgnini chief minister-rang, re·baenggipa August 15 tariko a·songni jakgitelaniko maniani ja·man, golmal ong·enggipa sima jolrangko re·ange nina tik ka·aha.
Iani bidingo kobor ra·timgiparangna talataniko on·angengon, Assam aro Meghalaya a·dokni simarango meligrikna man·jaenggipa bangki damdok biaprangoba tom·tomaniko aro meligrikaniko ra·bana a·dok damgnian kamrangko a·bachengataha aro a·dok damgnini chief minister-rang, August 15 tarikni ja·man, a·dok damgnini gisepo meligrikna man·jaenggipa sima jolrangko re·ange niegen ine Sukrobar salo, Meghalaya a·dokni Chief Minister Conrad K Sangma parakataha.
“Batanggimin salbrini gisepo chinga chang 10-na baten ku·siliting gita agangrikna man·aha. Dingtang dingtang a·selrangchi chinga so·sojengjeng ong·enggipa biaprangko niena man·kujaenga indiba August 15 tarikni ja·mande chinga ia biaprangko niena jotton ka·gen,” ine Sangma parakataha.
Iandakmiting somoio a·dok damgnini chief minister-rangan, sima jolrango ong·enggipa obostarangko namatna jotton ka·enga ineba Sangma parakataha.
West Jaintia Hills a·jani Block-I jolrango songdongenggipa Khasi-Pnar manderangni kosako Karbi bobil dolrangni dokkol ka·na jotton ka·enggipani bidingo janapatskaengon, iani bidingo ua Assam a·dokni Chief Minister Himanta Biswa Sarma baksa agangrikataha aro iako niatna gita ku·rachakataha ine a·dokni Chief Minister Conrad Sangma parakataha.
Block-I jolrango songdongenggipa Khasi-Pnar manderangko Karbi Longri-ni United People’s Front (UPF) bobil dol dokkol ka·na jotton ka·engani a·sel jolo songdongenggipa manderang kenchipchipe janggi tangna nangtokenga ine adita salrangna skangsan, Block-I jolo donggipa dingtang dingtang songni manderang parakatahachim.
“Iani bidingo anga Assam-ni chief minister baksa agangrikaha aro uaba iani bidingo suk ong·jaenga. Ia a·selrangni bidingo Assam sorkariba chanchirime ja·kuko de·na ku·rachakataha,” ine Sangma aganaha.