SHILLONG: Re·anggipa 2022 bilsini November jao, West Jaintia Hills a·jani Mukroh songo dosgri manderangko goe so·otgipani bidingo sandirokna gita Assam sorkarini songe donanggipa membor saksani committee, da·al Sombar salni bako Shillong-ona re·baenga.
Ia committee-ko dilna gita Assam sorkari, Gauhati High Court-ni gitcham judge, Justice Rumi Kumari Phukan-ko songe donangahachim aro ua Shillong-ona re·baenba, Assam House-o Meghalaya a·dokna hearing-ko dakanggen.
Hearing-ko dakanio Meghalaya sorkari, unsalo ong·gipa a·selni report-rangko, lekkarangko aro sakkirangko uni mikkango mesoke on·anggen.
Re·anggipa 2022 bilsini November 22 tariko, Assam police-rangni skatang goani a·sel Mukroh songni sakbonga manderang aro Assam-ni forest guard saksaba so·otako man·na nangahachim.
Indake ong·engon, Mukroh songni manderangna pilak nanga dakchakanirangko on·china aro inquiry commission-na pilak u·iatna nanganirangko on·china gita Khun Hynniewtrep Awakening Movement (KHNAM) dol, a·dok sorkariko didiataha.
Ia a·selni bidingo a·dok sorkari, maming ku·rangko on·gija dongchipaiaha ineba KHNAM, suk ong·gijaniko parakataha.
