SHILLONG: National Education Policy (NEP) 2020-ko ia 2023 bilsionin ra·gataniko Meghalaya College Teachers Association (MCTA) jegalenba, 1st semester-ko class ra·gija Non-Cooperation Movement (NCM)-ko dakengon, uamangna iani bidingo NEHU-ni official-rang aro mongsongbate Vice Chancellor Prabha Shankar Shukla, maming aganchakanirangko on·kujaengani gimin NCM-ko dakangkuna tik ka·aha.
Sonibar salo MCTA-ni tom·e chanchirimani ja·man, kobor ra·timgipa manderang baksa agangrikengon, NEP-ko ra·gatna gita re·anggipa July-ni 12 tariko NEHU-ni Vice Chancellor Prof Prabha Shankar Shukla-ni u·iataniko ra·pilchina uamang dabiengachim indiba da·onan ua an·tangni u·iataniko ra·pilkujaenga ine MCTA-ni general secretary Airpeace W Rani parakataha.
Meghalaya a·doko bang·bata college-rangan NEP 2020-ko ra·gatna gita tarikujaengoba NEHU VC-ni NEP-ko ia 2023 bilsionin ra·gatdrana tik ka·ahani gimin MCTA, re·anggipa July-ni 29 tarikonin VC-ni kamna suk ong·gijaniko mesokna gita 1st semester-ko class ra·gija NCM-ko dakna tik ka·angahachim.
NEHU-o Academic Council-sa iandakgipa kamrangni gimin chanchie ja·kuko de·dilgipa ong·achim indiba NEHU-ni VC, Academic Council-ni ra·chakchengani gri, NEP 2020-ko ra·gatdrana tik ka·aha aro ian niamni a·palo ong·enga ineba MCTA-ni general secretary suk ong·gijaniko parakataha.
“Academic Council-ni ra·chakchengani gri NEP-ko ra·gataniara lekka porani a·bao niamrangko re·badeani gita ong·enga. NEHU-ni NEP 2020-ko ra·gatdraaniara chatro chatrirang aro college-rango kam ka·gipa manderangni kosako re·anikosa mesokani ong·aha,” ine Rani parakataha.
Iani bidingo Academic Council-ni tom·aniko ong·atchina gita MCTA-ni dabianikoba NEHU-ni VC knachakkujaenga ineba Rani, suk ong·gijaniko parakataha.
“Chinga agangrikna gita NEHU-ni VC okamatgen ine chinga ka·dongengachim indiba da·alonan chingko ua agangrikna gita okamatkujaenga,” ine MCTA-ni general secretary parakataha.
Indake ong·engon, college-rango skigiparangni dabianiko NEHU-ni VC knachakgijani mesokengani gimin a·dokni gitcham MLA PT Sawkmie-ba suk ong·gijaniko parakatenba, dolgnini gisepo nanggrikaniko ta·raken namatchina NEHU-ni dilgiparangko didiataha.