SHILLONG: Meghalaya Assembly-ni gitcham Speaker aro United Democratic Party (UDP)-ni president Metbah Lyngdoh-ni kamo UDP-ni bang·a dilgiparangan kusi ong·niktokengani gimin da·oba uko changsataie term-sana UDP-ni president songtaiani cholrang dongenga ine UDP-oni kobor on·timgiparang u·iataha.
Kobor on·timgiparangni parakatani gitade, UDP-ni gitcham president Donkupar Roy sagi siangani ja·man, UDP-ko bilakbatatna gita rakbee kamrangko ka·ahani gimin UDP-ni bang·bata membor-rangan, Lyngdoh-ni kamo kusi ong·e, ukon da·oba president ong·china nangniktokenga.
Changbrina Mairang-ni MLA ong·enggipa Metbah Lyngdoh-ko 2019 bilsini September 11 tariko UDP-ni president-na seokchengahachim aro ua president-ni kamko jako ra·chengaoni, UDP-ni office-ko kulie on·anian uni chu·sokbatsranggipa kam ong·ahachim.
2018 bilsini Assembly election-o sakdok MLA-rangoni da·o ia 2023 bilsini Assembly election-o sak 12 MLA-rangko ong·katatahani giminba UDP-ni membor-rang, Lyngdoh-ko mitteltokaha.
Kobor on·timgiparangni parakatani gitade, Ranikor, Mawphlang aro Sohiong by-election-rangoba Lyngdoh-ni gisiko nange kamrangko ka·dilani a·selan UDP chu·sokgipa ong·na man·ahachim.
Re·baenggipa August-ni 12 tariko UDP-ni general conference-ko ong·atanio central executive committee-ni gital dilgiparangkoba seokangjolgen ineba UDP-oni kobor on·timgiparang parakataha.
Koborko on·ani gitade, UDP-ni da·o ong·enggipa executive committee, 2022 bilsion bon·ani ong·achim indiba sajinmani a·sel aro Assembly election-ni a·sel UDP-ni general council tom·aniko ra·doatna nangao ga·akahachim.
UDP-ni nomination committee-o Renikton Lyngdoh Tongkhar, PT Sawkmie, Mayralborn Syiem, Nujorki Sungoh aro Garo Hills-ni membor sakgni donggen.
