SHILLONG: Meghalaya a·doko niam gri koelarangko gipin a·songrangona watanina matnangako man·gipa Jaimaa Coal Pvt Ltd-ni apsan manderangan Vaishno Devi Traders Pvt Ltd-ni bimingoba gipin company dongtaia ine matnanganiko man·taiahani gimin iani bidingo talataniko on·china gita a·dok sorkariko, Meghalaya High Court ge·etangaha.
Meghalaya a·doko niam gri koelarangko gipin biaprangona watengani gimin iani giminba saksa Champer Sangma minggipa mande, High Court-o ijahar ka·doangahachim.
Sangma-ni Meghalaya High Court-o ijahar ka·doangani gitade, niam gri koelarangko badingenggipa ia company-rang, gipin biaprangonikosa koelarangko salbae gipin a·songrangona watatenga ine mesokengon, iarangni bidingo maming see rakkianirang dongjaenganian iandake niam gri koela watanio a·dok sorkarini jak donganiko mesokaniba ong·engachim.
Iana skang, a·dokni koelarangko niam gri gipin a·songrangona watenggipa Jaimaa Coal Pvt Ltd-ni apsan manderangan, Vaishno Devi Traders Pvt Ltd-ni bimingoba niam gri koelarangko badingatenga ine Sangma, High Court-na badi ka·doangaha.
Sangma-ni parakatani gitade, East Jaintia Hills a·jani metric ton 5340 koelarangko salanio bol 440-na baten truck-rang dongna gita nangachim indiba Right To Information (RTI) Act 2005-ni ning·o am·sandion, a·dokni official-rango ia koelarangko salani gimin maming see rakkianirang dongskajahachim.
Niamo pangchale iandakgipa kamrangni gimin gimin record-rangko rakkina nangachim aro manderangni sing·sandiani somoirango a·dokni official-rang mesoke on·na man·na nangachim ineba Sangma parakataha.
Indake ong·engon, iani bidingo talataniko on·china sorkarina ge·etaniko on·angengon, “Iandake matnanganirangna Transport department-ni Secretary, affidavit-ko file ka·anichi talataniko on·na nanga aro affidavit-ko antigittamni gisepon ka·na nanga,” ine High Court parakataha.
