TURA: Re·anggipa July-ni 24 tariko, Tura-ni Mini Secretariat-o so·sojengjeng ong·anina rim·ako man·gipa me·chikrangoni saksa Rakhi Sangma-ni segipa, Araimile police station-o FIR ka·doangenba, ua somoirango okumu chake jingjengatdilgipa manderangkoba apsan daken rim·china dabiangaha.
Rim·ako man·gipa Rakhi Sangma-ni segipa Balwan M Sangma-ni FIR-o janapatani gitade, Tura-ko Winter Capital songchina aro Reservation Roster-ko backlog policy gnang ra·gatchina dabidilgipa ACHIK aro GSMC-ni dilgiparang, chong·motan Bernitha R Marak, Laben Ch Marak aro Balkarin Ch Marak-sa uni jikgipa aro gipinrangkoba ua biapo uamangni okumu chake jingjengatanio bak ra·echina gita okamatahachim.
July-ni 24 tariko so·sojengjeng ong·ani somoioba, ACHIK aro GSMC-ni dilgiparangsa, uni jikgipa Rakhi aro gipin me·chikrangko ua biapona re·bae, manderangko nirokchina gita aganahachim ine FIR-o Balwan Sangma parakataha.
Uni jikgipade ia dilgiparang baksa Whatsapp gita agangrikjringe, uamangni ge·etanirang gitasan dakaiahachim ine janapatengon, uni jikgipa phone-oniko nina man·genchimode, ia dolgni dilgiparangni seatgipa message-rangkoba nina man·gen ine Balwan parakataha.
Uni jikgipa Rakhi-de ia dilgiparangni ge·etanikosan ja·rikpaengani gimin manderangko ding·chaoatanio jak dongjachim ine janapatengon, ua somoio okumu chake jingjengatdilgipa manderangni kosakoba apsan daken ja·kurangko de·skachina Balwan dabiangaha.
