SHILLONG: Meghalaya a·doko Captain Williamson Sangma Technical University-ko re·baenggipa 2024 bilsioni a·bachengatna sorkari parakatahaoba, da·o dipet Shillong-o gital State University-ko kuliani giminde kobor dongkujaenga.
Shillong-o gital State University-ko kulichina aro Captain Williamson Sangma Technical University-ni regional office/campus-ko Khasi-Jaintia Hills joloba kulichina dabie, Mongolbar salo Hynniewtrep Youth Council (HYC)-ni membor-rang, a·dokni Education Minister Rakkam A Sangma-ko grongeanio iako Education Minister parakataha.
Education Minister-ko grongani ja·man kobor ra·timgipa manderang baksa agangrikengon, Captain Williamson Sangma Technical University-kosa sorkari kulichengna nangnikenga aro Shillong-o State University-ko kuliani giminde ja·man chanchirimna gita Education Minister aganaha ine HYC-ni general secretary Roy Synrem parakataha.
Indake ong·genchimoba, Captain Williamson Sangma University-ni regional office/campus-ko Shillong-o kulina gitade Education Minister ku·rachakaniko on·ataha ineba Synrem parakataha.
HYC-ni parakatani gitade, Captain Williamson Sangma University-ko 2024 bilsio kulignok aro da·o ia university-ni vice chancellor-ko aro gipin kamrangna manderangko seokna gita kamrangko ka·engaha ineba Education Minister parakataha.
Gital National Education Policy (NEP) 2020-ko ia bilsi dipet ra·gatanio dingtang dingtang college-rangni chagrongna nangenggipa neng·nikanirangni giminba HYC, a·dokni Education Minister-na janape on·angaha.
NEP 2020-ko ia bilsioni ra·gatenga ong·ode pilak college-rangnan tangka paisarangko dakchake on·skachina gitaba HYC, a·dok sorkario dabiangaha.
Meghalaya a·doko CUET centre-rangko kulichina gita dabienggipani bidingo janapatengon, re·baenggipa bilsiode NEHU Shillong, NEHU Tura aro Jowai-oba CUET centre-rangko kulina gita Education Minister ku·rachakataha ine HYC-ni general secretary parakataha.
