SHILLONG: Meghalaya a·doko National Education Policy (NEP) 2020-ko ra·gatanio meligrikgijanirangko namatna man·kujaengon, ia gital NEP 2020-ko chatro chatrirangni namgnina ia 2023-2024 academic session-onin ra·gatna gita university, college, chatro chatrirang aro a·dok sorkario kam ka·enggipa pilak manderangkon ku·cholsan ong·e bakrimchina gita North Eastern Hill University (NEHU)-ni Vice Chancellor Prabha Shankar Shukla didiataha.
“Meghalaya a·doko NEP 2020-ko ra·gataniara lekka porani gadangko tang·doatanio ja·ku de·chakatani ong·enga. Ia gital Education Policy-ara chatro chatrirangna namroro silroroani, chanchina changani aro kamrangko ka·e cha·na cholrangko on·na miksonge tarigipa niamrang ong·a,” ine VC parakataha.
Ia gital NEP-o changa sapanirango pangchakgipa course aro internship-rangchi, gital chasongna kamni a·bao chatro chatrirangni u·i-ma·sianirangko taridapna gita cholrangko on·enga aro iandake chatro chatrirangni u·i-ma·sianirangko dingtangatani gride a·gilsakni nangani kri kam ka·nagipa manderangko ong·katatna man·jawa ineba NEHU-ni VC parakataha.
Ia gital NEP-ko ra·gatchengani somoio dingtang dingtang ra·biani aro neng·nikanirang dongaigen ine janapatengon, chatro chatrirangni namgnina NEHU, ia gital NEP-ko dingtang dingtang dolrangni bakrimanichi ia bilsionin ra·gatna tariaha ine VC parakataha.
“NEP 2020-ko ra·gatanio ja·manchakkugenchimode an·chingni noksan ong·aniko namatpilna neng·gnok. Chatro chatrirang bilsisa ja·manchakgnok aro 2026 bilsio graduate ong·enggipa chatro chatrirangba da·o NEP-ko ja·rikenggipa central university-rango admission-rangko man·janaba dongaha. NEHU-ba ma·mong sorkarini dongimin niamrango pangchake central university-an ong·ani gimin gipin central university-rang gitan NEP 2020-ko ra·gatna nangengaha. NEP 2020-ko ra·gatkujagenchimode NEHU-o admission ra·na nangenggipa chatro chatrirangnaba nangchakeaniko ra·banaba gnang,” ine NEHU-ni VC parakataha.
NEP-ko ra·gatjagenchimode NEHU-o bak ong·enggipa college-rang, ma·mong sorkarini on·enggipa dingtang dingtang cholrangko man·janaba gnang ineba Shukla parakataha.
